Yayın ən isti dövrü adətən iyulun son ongünlüyü və avqustun ilk ongünlüyünə təsadüf edir. Məhz bu müddətdə Avropada ən güclü və uzunmüddətli isti hava dalğaları müşahidə olunur.
Medianews.az oxu.az-a istinadən xəbər verir ki, istilərin ilk əlamətləri artıq qitənin cənub bölgələrində özünü göstərməyə başlayıb.
Son günlər isti hava dalğasının mərkəzi İspaniyadan İtaliyanın cənubuna doğru hərəkət edib.
Sardiniya adasında kölgədə havanın temperaturu 47 dərəcəyə çatıb. Bu göstərici adada 2023-cü ilin iyulunda qeydə alınmış 48.2 dərəcəlik mütləq rekorddan cəmi 1.2 dərəcə aşağıdır.
Bundan əlavə, hazırkı temperatur 2021-ci ilin yayında Siciliyada qeydə alınmış 48.8 dərəcəlik Avropa istilik rekorduna da kifayət qədər yaxındır.
Sinoptiklərin proqnozuna görə, yaxın günlərdə İtaliya, Yunanıstan və Balkan ölkələrində havanın temperaturu nisbətən enəcək. Buna baxmayaraq, Cənubi Avropada isti hava şəraiti davam edəcək və gündüz saatlarında temperatur 30-35 dərəcə arasında dəyişəcək.
Məlumata görə, gecə və səhər saatlarında da anomal isti hava müşahidə olunacaq. Bəzi ərazilərdə temperaturun 25 dərəcədən aşağı düşməyəcəyi gözlənilir. Bununla belə, əvvəlki istilik zirvəsi ilə müqayisədə havanın təxminən 10 dərəcə sərinləşəcəyi bildirilir.