Media
ABŞ haradadırsa, orada xaos var. Birləşmiş Ştatlar hansı münaqişəyə müdaxilə edibsə, orada daha çox problem ortaya çıxıb. Getdiyi yerdə qan çıxardan ölkə dünyanı qarışdırmağa davam edir. Bəlkə də, bu dövlət münaqişələrdən uzaq dursa, orada sülh olacaq. Amma hegemonluq istəyi ABŞ-nin amalıdır. Ona görə də dünyada baş verən proseslərə biganə qala bilmir.
Amerika Birləşmiş Ştatlarının dövlət katibi Antoni Blinkenin Qafqaz danışıqları üzrə baş məsləhətçi vəzifəsinə Filip Rikerin təyin olunmasına dair mətbuat bəyanatında bölgədəki vəziyyətlə bağlı qərəzli fikirlər səsləndirib. ABŞ rəsmisi bəyanatında Minsk qrupunun adını çəkərək ölmüş qurumu yenidən dirçəltməyə cəhd edib. Azərbaycan Xarici İşlər Nazirliyi məsələ ilə bağlı öz etirazını bildirib.
28 illik faəliyyəti boyunca heç bir iş görməyən qrupun dirçəldilməsindəki hədəflərin nələr olduğu maraq doğurur. Məsələ ilə bağlı Medianews.az-a danışan Azərbaycanın sabiq xarici işlər naziri, politoloq Tofiq Zülfüqarov bildirib ki, bununla münaqişəni yenidən alovlandırmaq istəyirlər:
“ABŞ-nin bəyanatının məqsədi kifayət qədər aydındır. Qərbin hədəfi münaqişəni yenidən alovlandırmaqdır. Buna da səbəb ABŞ münaqişədə mövqelərini qoruyaraq vəziyyəti idarə etmək istəyir. Məhz ona görə ermənilərə dəstək olaraq qurumu yenidən gündəmə gətirməyi planlaşdırırlar. Bu bəyanat göstərir ki, ABŞ Rusiya-Qərb qarşıdurmasını regionumuza gətirərək Azərbaycanı da mübarizəyə cəlb etməyə çalışır. Lakin Xarici İşlər Nazirliyindən verilən cavab göstərir ki, Azərbaycan Rusiya-Qərb qarşıdurmasından uzaq duracaq və Minsk qrupunun yenidən dirildilməsinin qarşısını alacaq. XİN açıq-aşkar bildirib ki, Qarabağ birmənalı olaraq Azərbaycanın daxili məsələsidir. Biz münaqişənin yenidən ortalığa atılmasını və alovlandırılmasını istəmirik. Azərbaycanın razılığı olmadan ərazimizlə bağlı heç bir qurum fəaliyyət göstərə bilməz”.
Politoloq Minsk qrupunun yenidən dirçəlməsinin zərərli tərəflərini də qeyd edib:
“Müharibədən bir neçə il öncə biz anladıq ki, Minsk qrupunun amalı məsələni həll etməkdən uzaqdır. Onlar sadəcə vaxt uzatmaqla məşğuldurlar. Bu qurum yalnızca Ermənistana sərf edib. Vaxtilə Minsk qrupunun yaranmasında əsas rol Azərbaycana məxsus olub. Dövlətimiz o zamanlar inanırdı ki, Avropada Təhlükəsizlik və Əməkdaşlıq Təşkilatı (ATƏT) təcavüz və aqressiyanın qarşısını ala bilər. Amma biz Qarabağ məsələsində gördük ki, yanılmışıq. Fransa kimi ermənipərəst dövlətin olduğu qurum bizə lazım deyil, onları vasitəçi kimi qəbul etmirik”.
Tofiq Zülfüqarov müharibədən sonrakı prosesləri də diqqətə çatdırıb:
“Müharibədən sonra Azərbaycan fərqinə vardı ki, qərbin heç bir faydası yoxdur. Qərbin faydasız olduğunu Minsk qrupu sübut edib. Bu səbəbdən ölkəmiz Rusiya-Türkiyə tandeminin (izahı: cütlük) daha çox imkanlara malik olduğunu anlayıb və əsas partnyorlar kimi bu tandemi seçib. Bu, uğurlu addımdır. Qərbin Azərbaycan-Rusiya-Türkiyə münasibətlərinə zərər vurmaq üçün Minsk qrupu məsələsini gündəmə gətirməsi heç bir fayda verməyəcək. Çünki qurumun yenidən dirçəlməsi mümkün olan məsələ deyil. Bunun üçün hüquqi əsaslar artıq sonlanıb”.
Xanlar Əlibəy
Medianews.az
