Media
Rusiya prezidentinin sözçüsü Dmitri Peskov bildirib ki, ABŞ faktiki olaraq Rusiya ilə iqtisadi müharibə aparır.
TASS-a istinadən xəbər veririk ki, Peskov “Birləşmiş Ştatlar Rusiyaya iqtisadi müharibə elan edib və onlar bu müharibəni de-fakto aparırlar” deyib.
“ABŞ-ın bütün dünyanı Rusiyaya qarşı sanksiya təzyiqinə cəlb etməyə çalışdığını nəzərə alsaq, Moskvanın bu müharibədə uduzmaması üçün hansı imkanları var” sualını cavablandıran Peskov deyib ki, “biz öz maraqlarımıza ən uyğun olanı etməliyik”.
Dövlət başçısının mətbuat katibi Rusiyanın hansı sahələrdə cavab sanksiyaları tətbiq edə biləcəyini açıqlamayıb.
“Sualınızı cavabsız qoyuram. Xeyr, hələlik heç bir təfərrüat verə bilmərəm”, – deyə o bildirib.
Peskovun sözlərinə görə, dünya enerji bazarlarında vəziyyət təlatümlü şəkildə inkişaf edir və onun hansı dərəcədə turbulentliyə çatacağı məlum deyil:
“Biz enerji bazarlarında vəziyyətin kifayət qədər təlatümlü inkişaf etdiyini görürük. Hamımız birlikdə nə dərəcədə turbulentliyə çatacağımızı bilmirik”.
Peskov ABŞ dövlət katibinin siyasi məsələlər üzrə müavini Viktoriya Nulandın “Şimal axını-2” layihəsini “metal yığını” adlandırmasına da münasibət bildirib.
Nulandın sözlərini şərh edən Peskov qeyd edib ki, “Şimal axını 2” qaz kəməri “metaldır, lakin istifadəyə hazırdır”.
Peskov bildirib ki, ABŞ-ın Rusiya enerji daşıyıcılarını almaqdan imtina qərarı Moskva tərəfindən ciddi şəkildə nəzərdən keçiriləcək, lakin Rusiya Federasiyası bu vəziyyətdə ona nə sərf edirsə, bunu edəcək.
“Rusiya nə edəcək? Rusiya bu vəziyyətdə ona nə lazımdırsa, onu da edəcək”, – Peskov vurğulayıb.
“Biz öz maraqlarımızı qoruyuruq, öz maraqlarımıza tam uyğun olaraq hər şeyi edəcəyik…
Biz dəfələrlə demişik ki, Rusiya təkcə Avropa qitəsinin deyil, həm də dünya səviyyəsində enerji təhlükəsizliyinin etibarlı təminatçısı olub, belədir və bundan sonra da olacaq”, – o, Rusiya Federasiyasının enerji təhlükəsizliyinə hazır olub-olmaması sualına cavabında vurğulayıb.
