Düzgün qidalanma yalnız çəki ilə deyil, ümumi sağlamlıq və gündəlik enerji səviyyəsi ilə də ölçülür. Mütəxəssislər bildirir ki, bəzən insan fərqinə varmadan səmərəsiz pəhriz rejiminə əməl edir və bu, orqanizmdə müxtəlif siqnallarla özünü göstərir.
Medianews.az Foodinfo.az-a istinadla xəbər verir ki, qidalanma üzrə mütəxəssislər pəhrizin effektiv olub-olmadığını anlamağa kömək edən əsas əlamətləri açıqlayıblar.
Mütəxəssislərin fikrincə, bir çox pəhrizin əsas problemi orqanizmi uzun müddət aclıq və vacib qida maddələrinin çatışmazlığı vəziyyətinə salmasıdır. Bu isə zamanla həm fiziki, həm də psixoloji narahatlıqlara yol açır. Qeyd olunur ki, bu əlamətlər insanın çəkisindən və ya geyim ölçüsündən asılı olmayaraq ortaya çıxa bilər.
Səmərəsiz qidalanmanın ilk əlaməti daim yemək istəyi ilə müşahidə olunur ki, bu da ciddi kalori çatışmazlığından xəbər verir. Tez-tez pəhriz pozuntuları da orqanizmin itirilən enerjini bərpa etməyə çalışmasının göstəricisi sayılır. Güclü halsızlıq və apatiya isə yağlar və karbohidratlar az olduqda enerjinin tükənməsi ilə əlaqələndirilir.
Daimi aclıq fonunda yaranan əsəbilik və əhvalın aşağı düşməsi, eləcə də B qrupu vitaminlərinin çatışmazlığı da diqqət çəkən məqamlardandır. Həzm sistemində yaranan narahatlıqlar, qarın ağrıları və yuxusuzluq da düzgün qurulmayan pəhrizin nəticəsi ola bilər. Qadınlarda menstrual dövrün pozulması da aclıq stressi ilə əlaqələndirilir.
Bundan əlavə, dəri, saç və dırnaqlarda problemlər yağ turşuları və heyvani mənşəli vitaminlərin azlığı ilə izah olunur. Bel nahiyəsində ağrılar isə bəzən yüksək zülallı pəhrizlər zamanı böyrəklərin həddindən artıq yüklənməsinə işarə edə bilər. Karbohidrat çatışmazlığı fonunda üşümə hissi və tez-tez baş verən uzunmüddətli soyuqdəymələr də səmərəsiz qidalanmanın əlamətləri sırasındadır.
Qidalanma üzrə mütəxəssislər sağlam pəhriz üçün bir neçə əsas prinsipə də diqqət çəkirlər. Onların sözlərinə görə, ac olanda yemək və toxluq hissi yarandıqda dayanmaq vacibdir. Rasionun müxtəlif olması, fərqli qida qruplarının balanslı şəkildə qəbul edilməsi sağlam qidalanmanın əsasını təşkil edir.
Mütəxəssislər həmçinin yeməkdən zövq almağın vacibliyini vurğulayırlar. Sakit şəkildə və tələsmədən yeyilən yemək beyinə toxluq siqnallarını daha yaxşı ötürür. Eyni zamanda, orqanizmin əsas ehtiyaclarını qarşılayacaq qədər qida qəbul etmək, müntəzəm yemək saatlarına riayət etmək aclıq və sonradan yaranan həddindən artıq yemə riskini azaldır.
Qeyd olunur ki, sağlam qidalanma bir günlük deyil, həftəlik balans əsasında dəyərləndirilməlidir və əsas məqsəd orqanizmin özünü rahat və enerjili hiss etməsidir.
