Fransada prezident seçkisini ifrat sağ qüvvə kimi tanınan Milli Birlik Partiyasından Marin Le Pen uda bilər.
Medianews.az bildirir ki, 2018-ci ilədək Milli Cəbhə Partiyası adlanmış Milli Birlik Partiyası 1972-ci ildə siyasətçi Jan-Mari Le Penin liderliyi ilə yaradılıb. 2011-ci ildən quruma onun qızı Marin Le Pen başçılıq edib. 2022-ci ildən Jordan Bardella liderdir, ancaq əsas fiqur kimi Marin Le Pen qalır.
1968-ci il təvəllüdlü Marin Le Pen qatı millətçi, birləşmiş Avropa ideyasının əleyhdarıdır.
2027-ci ilin prezident seçkisinin birinci turu aprelin 18-nə, ikinci turu mayın 2-nə təyin olunub.
Prezident 5 ildən bir seçilir. Ardıcıl iki dəfədən artıq prezident postu tutmaq yasaqdır.
2017 və 2022-ci illərin seçkilərində Emmanuel Makron prezident mandatı alıb.
“Toluna Harris İnteractive” şirkətinin 7-8 iyulda 1837 seçici arasında keçirdiyi onlayn sorğunun nəticələrinə görə, Marin Le Pen ilk turda 35 faiz səs toplaya bilər.
İfrat solçu, Fəthedilməz Fransa Partiyasının lideri Jan-Lük Melanşon 16 faiz, sağ mərkəzçi Üfüqlər Partiyasının lideri, sabiq baş nazir Eduar Filipp 14 faiz, hakim komandaya bağlı İntibah Partiyasının lideri, sabiq baş nazir Qabriel Attal 8 faiz dəstəklə göstərilir.
İkinci turda Marin Le Penin şansı 51 faiz, Eduar Filippin şansı 49 faizdir.
Fransada hökumət həm prezident seçkisinin, həm də parlamentin aşağı palatasına - Milli Məclisə seçkinin nəticələri əsasında qurulur. İndiki Milli Məclis 2024-cü ilin yayında keçirilmiş növbədənkənar seçkidə formalaşıb. Prezidentə bağlı İntibah Partiyası və müttəfiqləri Milli Məclisdə azlıqda olsa da, hökumət formalaşdıra bilir.
Toğrul Əli,
Medianews.az