Yay aylarında isti havadan qorunmaq üçün kondisionerlərdən geniş istifadə olunur. Lakin bir çox insan kondisionerin soyuqdəyməyə səbəb olub-olmadığı barədə narahatlıq keçirir. Mütəxəssislər bildirirlər ki, kondisioner özü birbaşa infeksiya mənbəyi deyil, lakin düzgün istifadə edilmədikdə orqanizmin müdafiə imkanlarına təsir göstərə bilər.
Həkimlərin sözlərinə görə, virus xəstəliklərinə yoluxmaq üçün əsas şərt xəstəlik törədicisi ilə təmasdır. Kondisionerdən çıxan hava insanı birbaşa virusa yoluxdurmur, lakin temperatur fərqi və soyuq hava axını bəzi hallarda bədənin müqavimətini zəiflədə bilər. “İndi bilirsiniz” rubrikasında pediatr Yelena Sirotenko kondisionerdən istifadə zamanı yaranan risklər barədə danışıb.
Medianews.az xəbər verir ki, mütəxəssisin sözlərinə görə, soyuq havanın tənəffüs yollarının selikli qişasına təsiri zamanı damarlar darala bilər. Bu isə həmin nahiyədə qan dövranının müvəqqəti zəifləməsinə və yerli immun müdafiənin azalmasına səbəb ola bilər. Əgər insan həmin vaxt artıq hər hansı virusla təmasda olubsa, xəstəliyin üzə çıxma ehtimalı arta bilər.
Həkim qeyd edib ki, kondisionerdən istifadə zamanı ən böyük risklərdən biri küçə temperaturu ilə otaq temperaturu arasındakı kəskin fərqdir. Məsələn, isti havada çöldə temperaturun 35 dərəcə olduğu halda, kondisionerli otaqda temperaturun 20 dərəcəyə qədər aşağı salınması orqanizm üçün əlavə gərginlik yarada bilər.
Mütəxəssislər kondisionerdən istifadə zamanı temperaturu həddindən artıq aşağı salmamağı tövsiyə edirlər. Otaq temperaturunun tədricən dəyişdirilməsi, soyuq hava axınının birbaşa insanın üzərinə və bədəninə yönəldilməməsi sağlamlıq üçün daha təhlükəsiz hesab olunur.
Bundan əlavə, kondisionerin filtrlərinin vaxtında təmizlənməsi də vacibdir. Çirkli filtrlər otaqda toz hissəciklərinin və allergenlərin yayılmasına səbəb ola bilər ki, bu da xüsusilə həssas insanlarda narahatlıq yarada bilər.
Mütəxəssislərin fikrincə, kondisioner düzgün istifadə edildikdə yay istisində rahatlıq yaradan faydalı vasitədir. Əsas məsələ temperatur rejiminə əməl etmək, otağı mütəmadi havalandırmaq və orqanizmi kəskin istilik dəyişikliklərindən qorumaqdır.\\Foodinfo.az