Yay aylarında bir çox insan xüsusilə günorta yeməyindən sonra qəfil yorğunluq və yuxululuq hissi yaşayır. İsti hava, qidalanma xüsusiyyətləri və orqanizmdə baş verən fizioloji dəyişikliklər bu vəziyyətin əsas səbəblərindən biri ola bilər.
Mütəxəssislər bildirirlər ki, istidə nahardan sonra enerjinin azalması təsadüfi hal deyil və bədənin təbii reaksiyası hesab olunur. Yüksək temperatur zamanı orqanizm özünü soyutmaq üçün daha çox enerji sərf edir, həzm prosesi isə əlavə yük yaradır. “Çempionat”a açıqlamasında dietoloq Viktoriya Kostrova isti havalarda yeməkdən sonra yuxu istəyinin səbəbləri barədə danışıb.
Medianews.az xəbər verir ki, mütəxəssisin sözlərinə görə, bu vəziyyətə bir neçə amil təsir edir. İlk növbədə isti havada qan damarları genişlənir ki, bədən temperaturunu tənzimləyə bilsin. Bu zaman qan təzyiqində müəyyən azalma baş verə bilər. Yemək qəbul edildikdə isə qan dövranının bir hissəsi həzm sisteminə yönəlir və nəticədə insan özünü daha halsız və yuxulu hiss edə bilər.
Dietoloq qeyd edib ki, yay aylarında qida rasionunda tez həzm olunan karbohidratların çoxalması da bu vəziyyəti gücləndirə bilər. Şirin içkilər, çoxlu meyvə və digər şəkərli məhsullar qanda qlükoza səviyyəsinin sürətlə artmasına səbəb olur. Bunun ardınca ifraz olunan insulin hormonu bəzi prosesləri sürətləndirərək insanın yuxululuq hiss etməsinə şərait yarada bilər.
Digər mühüm səbəblərdən biri isə gizli susuzlaşmadır. İsti havalarda tərlə birlikdə orqanizm maye itirir və qan daha qatı hala gələ bilər. Bu isə toxumalara oksigen daşınmasını çətinləşdirərək ümumi yorğunluq və zəiflik hissi yarada bilər.
Mütəxəssislər yay günlərində günorta yeməyinin daha balanslı hazırlanmasını tövsiyə edirlər. Süfrənin əsas hissəsini keyfiyyətli zülal mənbələri, məsələn, balıq, quş əti və bol göyərti təşkil etməlidir. Ağır və çox karbohidratlı yeməkləri isə günün daha gec saatlarına saxlamaq məsləhət görülür.
Bundan əlavə, gün ərzində kifayət qədər su qəbul etmək vacibdir. Orqanizmin su balansını qorumaq qan dövranının yaxşı işləməsinə, enerjinin saxlanmasına və isti havalarda daha fəal qalmağa kömək edir.
Dietoloqlar bildirirlər ki, yayda düzgün qidalanma yalnız sağlamlıq üçün deyil, həm də gün ərzində iş qabiliyyətinin qorunması üçün mühüm amildir. Balanslı nahar insanın isti havalarda belə enerjili və diqqətli qalmasına imkan yaradır.\\Foodinfo.az