Göz xəstəlikləri üzrə mütəxəssis Op. Dr. Özer Kavalcıoğlu gündəlik həyatda edilən bəzi vərdişlərin görməni ciddi şəkildə zədələdiyini bildirir.
Medianews.az xəbər verir ki, bu barədə “Haberler” məlumat yayıb.
Həkimə görə, göz problemi yaşayan bir çox insan şikayətləri “öz-özünə keçər” deyə təxirə saldığı üçün gecikmiş diaqnozla üzləşir.
Ən təhlükəli səhvlər:
1. Şikayətləri gözardı etmək
Ani bulanıqlıq, işıq çaxması, uçuşmalar və ya qəfil görmə itkisi retina yırtığı və ya damar tıxanması kimi təcili müdaxilə tələb edən halların əlaməti ola bilər. Göz problemlərində gözləmək risklidir.
2. Göz damlalarından özbaşına istifadə
Xüsusilə kortizonlu damlalar nəzarətsiz istifadə edildikdə glokoma, infeksiyaların dərinləşməsinə və kornea zədələnməsinə səbəb ola bilər. Göz damlası yalnız həkim təyinatı ilə istifadə olunmalıdır.
3. Gözləri ovmaq
Alergiya və ya yorğunluq səbəbiylə gözü ovmaq korneanın incəlməsi və keratokonusa gətirib çıxara bilər. Göz toxuması təzyiqə qarşı çox həssasdır.
4. Ekrana baxarkən gözləri az qırpmaq
Uzun müddət telefon və kompüter istifadəsi qırpma sayını azaldır, bu da quruluq və yanmaya səbəb olur. Həkim hər 20 dəqiqədə 20 saniyə uzağa baxmağı tövsiyə edir.
5. Linzadan qaydalara uyğun istifadə etməmək
Linzayla yatmaq, onu suyla yumaq və qabı vaxtında dəyişməmək ciddi infeksiyalara yol açır. Kontakt linza tibbi vasitədir, kosmetik məhsul deyil.
6. UV qorumasız gün eynəyi taxmaq
Keyfiyyətsiz gün eynəkləri göz bəbəyini genişləndirərək zərərli şüaların daha çox daxil olmasına səbəb olur. Gün eynəyi aksesuar yox, qoruyucu vasitədir.
7. Uzun müddət müayinəyə getməmək
Glokom kimi xəstəliklər simptomsuz irəliləyə bilər. Mütəmadi göz müayinəsi görmənin gələcək sağlamlığının əsas şərtidir.
Həkim bildirir ki, göz sağlamlığı gündəlik kiçik vərdişlərdən asılıdır və düzgün davranışlarla qorunur. Gözlər ömür boyu xidmət edir — onları qorumaq isə hər bir insanın öz məsuliyyətidir.
Medianews.az
