Media
Dünyada gedən qlobal bahalaşmanın Azərbaycana təsiri ilə bir çox məhsulların qiymətində artım müşahidə olunur. Son məlumata görəm, un və ət bahalaşıb. Çörəyin bahalaşacağı ilə bağlı da iddialar var. Qiymətlər qalxır, insanların gəlirləri isə stabil qalır. Bu da əhalinin sosial vəziyyətinin ağırlaşacağından xəbər verir. Artıq cəmiyyəti əhalinin maaşlarının nə vaxt artırılacağı maraqlandırır.
Məsələ ilə bağlı Medianews.az-a açıqlama verən deputat, Milli Cəbhə Partiyasının sədri Razi Nurullayev bildirib ki, insanların gəlirlərinin artırılması ilə bağlı dövlət tədbiri nəzərdə tutula bilər:
“Dünyada gedən qlobal bahalaşma Azərbaycana da təsir edib. Unun qiymətinin bahalaşması çörək qiymətlərinə də təsir edəcək. Ölkəmizdə çörək istehlakı yüksək səviyyədədir. Əsas yemək rasionunu çörək təşkil edən insanlar çoxdur. Bahalaşma davam edərsə, insanların sosial vəziyyəti ağırlaşacaq. Çünki bahalaşma ilə insanların gəlirləri tərs mütənasibdir. Bu hökuməti ciddi narahat edir”.
Millət vəkili əhalinin gəlirlərinin artırılması ilə bağlı dövlətin tədbir görəcəyini söyləyib:
“Ölkəmizdə kənd təsərrüfatına ayrılan diqqət nəticəsində taxıla olan ehtiyacımızın 70-80 faizini ödəmək iqtidarındayıq. Həmçinin neft və qaz qiymətlərinin yüksəlməyi də büdcəyə müsbət təsir edir. Büdcədə artımlar müşahidə olunduqca əhalinin sosial vəziyyəti yaxşılaşdırılacaq. Xüsusilə qiymət artımından sonra insanların gəlirlərinin artırılması əhəmiyyət kəsb edir. Dövlət iş adamlarının da bu sahədə olan çətinliklərini aradan qaldıra bilər. Məsələn, hökumət həmin məhsulları idxal edən iş adamlarının xərclərini ödəyə bilər. Bahalaşma ciddi məsələdir və hökumət bununla bağlı addımlar atacaq”.
Xanlar Əlibəy
Medianews.az
