Keçən həftə parlamentdə etimad səsini itirən və dünən istefa verən Bolqarıstanın baş naziri Kiril Petkov 70 rus diplomatın casusluq fəaliyyətinə görə ölkədən çıxarıldığını açıqlayıb.
“Bu gün 70 rus diplomatı ölkədən çıxardıq. Onların bir çoxu birbaşa (kəşfiyyat) xidmətlərdə işləyirdi və onların diplomatik rolu daha çox ört-basdır edirdi”,-deyə açıqlamasında bildirib.
Bolqarıstan Xarici İşlər Nazirliyindən verilən açıqlamada Rusiyanın Bolqarıstandakı diplomatik varlığının 48 nəfərlə məhdudlaşdırıldığı və ölkədən çıxarılan rus diplomatların bazar günü gecə yarısına qədər ölkəni tərk etmələrinin istəndiyi bildirilib.
Adı açıqlanmayan mənbə Rusiya mətbuatına bildirib ki, Rusiya Bolqarıstana ən qısa zamanda cavab verəcək. Rusiya hələ ki, casusluq iddialarına cavab verməyib.
Xatırladaq ki, Rusiyaya qarşı sərt mövqe tutan Petkov, fevral ayında Rusiyanın Ukraynaya qarşı “xüsusi hərbi əməliyyat” kimi təsvir etdiyi əməliyyatı “müharibə” adlandırmaqdan imtina etdiyi üçün müdafiə nazirini vəzifəsindən azad edib .
Leyla, Medianews.az