İsti yay günlərində orqanizmin qidaya olan ehtiyacı və həzm sistemi üçün düşən yük dəyişir. Mütəxəssislər bildirirlər ki, xüsusilə səhər yeməyində ağır və yağlı məhsullardan uzaq durmaq, daha yüngül və balanslı qidalara üstünlük vermək vacibdir. Zülal, lif, mürəkkəb karbohidratlar və vitaminlərlə zəngin səhər menyusu gün ərzində enerji səviyyəsinin qorunmasına kömək edə bilər.
Medianews.az xəbər verir ki, həkim Aleksandr Umnov yay mövsümündə səhər yeməyinin yüngül, lakin qida dəyəri yüksək olmasının vacibliyini vurğulayıb.
Mütəxəssisin sözlərinə görə, isti havalarda həddindən artıq yağlı, ağır və çox şirin səhər yeməkləri orqanizmdə ağırlıq hissi yarada bilər. Həkim yay üçün uyğun seçimlərdən biri kimi əvvəlcədən hazırlanan yulaf sıyığını tövsiyə edib. Bunun üçün yulaf lopaları axşamdan su, qatıq və ya kefirlə qarışdırılır, üzərinə çia toxumu və darçın əlavə edilir. Səhər isə bu qarışığa giləmeyvə, şaftalı və ya nektarin kimi meyvələr əlavə etməklə həm dadlı, həm də faydalı səhər yeməyi hazırlamaq mümkündür.
Mütəxəssislər qeyd edirlər ki, yay aylarında kifayət qədər maye qəbul etmək və qidalanmada təzə meyvə-tərəvəzlərə üstünlük vermək də vacibdir. Bununla yanaşı, kofe istifadəsi ilə bağlı hamı üçün eyni norma olmadığını bildirən kardioloq Yuri Konev qeyd edib ki, gündəlik qəhvə miqdarı insanın sağlamlıq vəziyyətindən, qəbul etdiyi dərmanlardan və fərdi xüsusiyyətlərindən asılıdır. Bəzi insanlar üçün gündə beş fincan qəhvə problem yaratmasa da, digərləri üçün bu miqdar artıq ola bilər. Mütəxəssislər həmçinin şərbətli qəhvə içkilərində şəkərin miqdarının yüksək ola biləcəyinə diqqət çəkirlər.\\Foodinfo.az