Serbiya Prezidenti Aleksandr Vuçiç Macarıstan Baş naziri Viktor Orbanla telefon danışığı zamanı iki ölkəni birləşdirən strateji qaz kəmərinin yaxınlığında partlayıcı maddələrin aşkar edildiyini açıqlayıb.
Medianews.az Musavat.com-a istinadla xəbər verir ki, Vuçiç bu barədə öz "Facebook" səhifəsində məlumat yayaraq, Serbiya hüquq-mühafizə orqanlarının kritik infrastruktur obyektinə qarşı hazırlanan diversiya cəhdinin qarşısını aldığını bildirib. "Mən indicə Macarıstanın Baş naziri Viktor Orbanla telefon danışığımı başa vurdum və hərbçilərimizlə polisimizin apardığı təhqiqatın ilkin nəticələri barədə ona məlumat verdim," — deyə Serbiya lideri qeyd edib.
Onun sözlərinə görə, təhlükəsizlik qüvvələri boru kəmərinin partladılması üçün lazım olan partlayıcı maddə və detonatorları aşkar ediblər. Bu hadisə Avropanın enerji təhlükəsizliyi üçün "ikinci Şimal Axını" ssenarisi kimi qiymətləndirilir, çünki sözügedən kəmər Macarıstanın Rusiya qazını aldığı əsas marşrutlardan biridir.
Təhqiqatın gedişində diversiya cəhdinin arxasında duran qüvvələrin kimliyi barədə hələlik rəsmi məlumat verilməsə də, hər iki ölkədə enerji obyektlərinin mühafizəsi ən yüksək səviyyəyə qaldırılıb. Viktor Orbanın bu xəbərdarlıqdan sonra Macarıstanın Milli Təhlükəsizlik Şurasını təcili iclasa çağırdığı bildirilir.