Havaların isinməsi və bitkilərin çiçəkləməsi ilə havaya yayılan tozcuqlar (polenlər) allergik rinit hallarının artmasına səbəb olub.
Medianews.az xəbər verir ki, bu barədə türkiyəli immunologiya və allergiya üzrə mütəxəssis Mahir İğde danışıb.
O bildirir ki, yaz allergiyası həm böyüklərdə, həm də uşaqlarda geniş yayılıb, lakin uşaqlar daha həssas olduqları üçün bu xəstəlikdən daha çox təsirlənirlər.
Mütəxəssisin sözlərinə görə, valideynlərdən birində allergiya olduqda uşaqlarda da allergik rinitin yaranma ehtimalı artır.
Allergik rinit necə yaranır?
Allergik reaksiya immun sisteminin allergenlərə həddindən artıq cavabı nəticəsində meydana gəlir. Allergenlə təkrar təmas zamanı orqanizmdə histamin adlı maddə ifraz olunur və bu da tipik allergiya əlamətlərinə səbəb olur.
Yaz allergiyasının əsas səbəbləri
Yaz allergiyasının ən geniş yayılmış səbəbi polenlərdir. Onların havada çox olduğu dövrlər belədir:
- Ağac polenləri – mart-may ayları
- Ot polenləri – may-iyun ayları
- Bitki və çiçək polenləri – yay sonu və payız
Bundan başqa ev tozu gənələri, kif sporları və heyvan tükləri də allergiyanı gücləndirə bilər.
Uşaqlarda əsas əlamətlər
- Burun axması və tutulması;
- Burunda qaşınma və tez-tez asqırma;
- Gözlərin qaşınması və yaşarması;
- Boğazda qıcıqlanma və öskürək;
- Burun arxasına axıntı.
Mütəxəssis qeyd edir ki, uzun müddət davam edən burun tutulması uşaqlarda yuxu pozuntusu, yorğunluq və iştahsızlığa səbəb ola bilər, hətta məktəb nailiyyətlərinə də mənfi təsir göstərə bilər. Vaxtında müalicə olunmadıqda isə sinusit və astma riskini artırır.
Yaz allergiyasından qorunma yolları
Həkimlər allergiyanın qarşısını almaq üçün bir sıra sadə tədbirləri tövsiyə edirlər:
- Polenlərin çox olduğu saatlarda açıq havaya çıxmamaq;
- Evi mütəmadi təmizləmək və pəncərələri bağlı saxlamaq;
- Hava təmizləyici cihazlardan istifadə etmək;
- Pambıq və ya sintetik yastıq və yorğanlara üstünlük vermək;
- Otaqda rütubət balansını qorumaq;
- Ev bitkilərinin sayını məhdudlaşdırmaq;
- Balanslı qidalanmaq və immuniteti gücləndirmək;
- Bağ işləri zamanı qoruyucu maskadan istifadə etmək;
- Avtomobildə pəncərələri bağlı saxlamaq və kondisioner filtrlərini vaxtında dəyişmək.
Həkimlər xüsusilə astması olan uşaqlarda allergiya əlamətləri yarandıqda vaxt itirmədən mütəxəssisə müraciət etməyi tövsiyə edirlər. Vaxtında diaqnoz və düzgün tədbirlərlə yaz aylarını daha rahat keçirmək mümkündür.
Medianews.az