Pəhriz saxlayan şəxslər üçün imsak (sübhdən əvvəl qəbul edilən yemək) gün ərzində həm enerjini qorumaq, həm də aclıq hissini nəzarətdə saxlamaq baxımından xüsusi əhəmiyyət daşıyır.
Medianews.az Foodinfo.az-a istinadən xəbər verir ki, düzgün seçilmiş imsak menyusu həm arıqlama prosesini dəstəkləyir, həm də metabolizmanın zəifləməsinin qarşısını alır.
İmsak süfrəsində ilk növbədə zülal mənbələri yer almalıdır. Yumurta, kəsmik, qatıq və az yağlı pendir kimi qidalar uzun müddət toxluq hissi yaradır, gün ərzində qəfil aclığın qarşısını alır. Zülal eyni zamanda əzələ kütləsinin qorunmasına kömək edir ki, bu da sağlam çəki itkisi üçün vacibdir.
Lifli qidaların da menyuda olması tövsiyə edilir. Yulaf sıyığı, tam buğda çörəyi, təzə tərəvəzlər və bir porsiya meyvə həzm sistemini dəstəkləyir və qan şəkərinin sabit qalmasına yardımçı olur. Lifli qidalar toxluq müddətini uzadaraq gün ərzində həddindən artıq yeməyin qarşısını alır.
Sağlam yağlar da balansın qorunmasında mühüm rol oynayır. Qoz, badam, zeytun və az miqdarda zeytun yağı orqanizmə enerji verir və uzunmüddətli toxluq yaradır.
Bununla yanaşı, şirin xəmir məhsulları, ağ çörək, şəkərli və qazlı içkilərdən uzaq durmaq tövsiyə olunur. Bu cür qidalar gün ərzində tez aclıq və susuzluq hissinə səbəb ola bilər.
İmsakda kifayət qədər su içmək vacibdir. Beləliklə, balanslı və ölçülü sahur menyusu pəhriz saxlayanlara həm sağlam şəkildə çəki azaltmağa, həm də gün ərzində enerjili qalmağa imkan verir.