Böyük Britaniyada hər həftə “sağlam və fiziki cəhətdən güclü” hesab edilən 12 gənc əvvəllər aşkarlanmayan ürək xəstəlikləri səbəbindən qəfil həyatını itirir.
Medianews.az xəbər verir ki, bununla bağlı “Gənclərdə Ürək Riski” (“Cardiac Risk in the Young”) təşkilatı məlumat yayıb.
Təşkilat bildirib ki, bu halların təxminən 80 faizində ölümə qədər heç bir əlamət və ya simptom müşahidə olunmur.
Mütəxəssislər 14-35 yaş arası gənclərin gizli ürək xəstəlikləri baxımından mütəmadi müayinədən keçməsini vacib sayırlar. Bu müayinələrə ürəyin ritmini və elektrik aktivliyini ölçən elektrokardioqramma (EKQ), zərurət olduqda isə ürəyin quruluşu və fəaliyyətini qiymətləndirən exokardioqramma daxildir.
Londonun Siti Sent-Corc Universitetinin alimləri 2008-2018-ci illər arasında 104 mindən çox gəncin EKQ nəticələrini təhlil ediblər. Araşdırma göstərib ki, müayinədən keçən hər 300 gəncdən birində nəzarətsiz və müalicəsiz qalarsa ölümcül nəticələrə səbəb ola biləcək ürək xəstəlikləri aşkarlanıb.
Diaqnoz qoyulanların 40 faizdən çoxuna riskin azaldılması üçün kardiostimulyator, implantasiya olunan defibrilyator, ablasiya əməliyyatı, bəzi hallarda isə ürək transplantasiyası kimi müdaxilələr tətbiq olunub. Digər xəstələrə isə müalicə planı təqdim edilib.
Tədqiqatın rəhbəri professor Maykl Papadakis bildirib ki, ürək skrininqi həyat xilas edə bilər. Onun sözlərinə görə, bir dəfəlik müayinə kifayət etmir, çünki bəzi ürək xəstəlikləri sonradan inkişaf edir və erkən mərhələdə aşkarlanması çətin olur.
Mütəxəssislər hesab edir ki, daha ağıllı və davamlı profilaktik tədbirlər gənclər arasında qəfil ürək ölümlərinin qarşısını almaqda mühüm rol oynaya bilər.