Əhalinin azalması fonunda getdikcə daha çox İsveç bələdiyyəsi boş mənzil problemi ilə üzləşir.
"Dagens Nyheter” tərəfindən aparılan sorğuya görə, 177 bələdiyyə və onlara məxsus mənzil şirkətlərinin təxminən 40 faizi artıq mənzil kirayələməkdə çətinlik çəkir və 7000-dən çox mənzil boş qalır. Şəxsi ev və mülk sahibləri tərəfindən istifadə edilən evlər hesablamaya daxil edilmədiyi üçün faktiki rəqəm xeyli yüksək ola bilər.
Göstərilən əsas səbəblərə 2015-ci il miqrant böhranından sonra doğum nisbətinin azalması, urbanizasiya və immiqrasiyanın azalması daxildir. Mütəxəssislər xəbərdarlıq edirlər ki, əhalisi azalan bələdiyyələrin sayı yaxın illərdə daha da arta bilər.
Bəzi bölgələrdə vəziyyət artıq mənzillərin sökülməsi qərarlarına səbəb olub. Məsələn, Kramfors şəhərində mənzil fondunun təxminən 5 faizini təşkil edən 100-dən çox mənzilin sökülməsi planlaşdırılır. Şirkət rəhbərliyinin məlumatına görə, mənzillərin təxminən 10 faizi boş qalır və bu da ciddi maliyyə problemləri yaradır.
Araşdırmaya görə, bələdiyyələrin təxminən 13 faizi bəzi yaşayış binalarının sökülməsini zəruri hesab edir. Respondentlərin təxminən dörddəbiri, həmçinin əhalinin daha da azalmasının vergi gəlirlərinin azalması və yaşlanan əhali üçün xərclərin artması səbəbindən bələdiyyələrin iqtisadi gələcəyini təhlükə altına ala biləcəyindən qorxur.
Lakin ölkə daxilində vəziyyət dəyişir. Əsas şəhər yerlərində mənzil çatışmazlığı davam edir və bahalı yeni binaların tikintisində bəzi çətinliklər yaranır./AZƏRTAC