Çində qlobal istiləşmənin yaratdığı yüksək temperaturla mübarizə məqsədilə şəhərlərdə yeni texnologiya tətbiq olunmağa başlayıb.
Medianews.az xəbər verir ki, binaların damlarına quraşdırılan xüsusi "dam yağış sistemləri" vasitəsilə süni yağış yaradılaraq ətraf mühitin temperaturu aşağı salınır.
Məlumata görə, sistem damlarda quraşdırılmış xüsusi püskürtmə mexanizmləri vasitəsilə su damcılarını havaya yayır. Bu üsul sayəsində ətraf mühitin temperaturunun cəmi bir neçə dəqiqə ərzində 5-8 dərəcə Selsi aşağı düşdüyü bildirilir.
Layihənin əsas məqsədi isti havanın təsirini azaltmaq, binaların səthini sərinləşdirmək və xüsusilə sıx məskunlaşmış şəhər ərazilərində kondisionerlərdən istifadəni minimuma endirməklə enerji sərfiyyatını azaltmaqdır.
Sosial şəbəkələrdə yayılan görüntülər qısa zamanda geniş maraq doğurub. İstifadəçilər binaların damlarından süni yağışın yaradıldığı anları əks etdirən videoları paylaşaraq bu texnologiyanı qlobal istiləşməyə qarşı tətbiq edilən maraqlı həll yollarından biri kimi qiymətləndirirlər.
Mütəxəssislər hesab edirlər ki, bu cür sistemlər şəhərlərdə istilik adası effektinin azaldılmasına və enerji səmərəliliyinin artırılmasına töhfə verə bilər.
Medianews.az