“Rusiyada çevrilişə hazırlıq sürətlənib” – Politoloq

“Rusiyada hakimiyyət çevrilişinə hazırlıq sürətlənib”. Politoloq Xaqani Cəfərli Medianews.az-a açıqlamasında belə deyib. O bildirib ki, Ukrayna kəşfiyyatının həyata keçirdiyi “Hörümçək toru-1” və “Hörümçək toru-2” əməliyyatları, daxili yazışmalarında Çini düşmən ölkə kimi xarakterizə edən Rusiya Federal Təhlükəsizlik Xidmətinin məxfi sənədlərinin “New York Times” qəzetinə ötürülməsi bu qənaəti yaradır: “Belə görünür ki, Rusiya elitasındakı hansısa qrup Rusiya-Çin dostluğundan ağız dolusu danışan rəsmi Moskvadan fərqli olaraq Çini düşmən hesab edən “qeyri-rəsmi Moskva”nın mövcudluğu ilə bağlı mesaj verməyə çalışır. “Qeyri-rəsmi Moskva“ Çini Rusiyanın Uzaq Şərqdəki ərazilərini ələ keçirmək niyyətində ittiham etməklə buna şərait yaradan Putin iqtidarının Pekinə satılmış vətən xainləri olması ilə bağlı düşüncələrin yayılmasına nail olsa, Rusiyada yaxın zamanlarda hakimiyyət dəyişikliyi qaçılmaz olacaq. “Hörümçək toru-1” və “Hörümçək toru-2” əməliyyatlarının gerçəkləşməsi də hakimiyyət dəyişikliyinə münbit şərait yaradacaq hərbi məğlubiyyətə gedən yolun başlanğıcı ola bilər. Kəmiyyətin keyfiyyətə keçməsi qanunu qüvvədədir”. Nailə Qasımova, Medianews.az