Bu gün Azərbaycanda son zəng idi. Zaman keçdikcə hər şey dəyişir. Bəs, görəsən, son zənglər də dəyişibmi? Əvvəlki illərdə son zəng necə olurdu, bəs indi necədir?
Medianews.az-a mövzu barədə danışan Azərbaycanın xalq artisti, aktyor Nurəddin Mehdixanlı dedi ki, onların vaxtında son zəngin bər-bəzəyi yox idi, amma səmimi, gözəl idi: “Yəni daha çox bər-bəzək olan yerdə, o yerdə ki daha çox formaya, zahiri gözəlliyə qaçırsan, burada səmimiyyət, şirinlik, istilik itir. Yəni bu fərq var. Zaman, şərtlər başqa idi. İnsanlar başqa cür sevinirdilər. Onda bir-birinin üzünə baxıb gülmək xoşbəxtlik idi. Amma indi xoşbəxt olmaq üçün daha artıq şeylər lazımdır. Təhsil sistemi də başqadır. Duyğular, düşüncələr, həyata baxış fərqlidir. Biz o zaman daha çox romantik idik. Dünyaya başqa cür baxırdıq. Hər şeydə ancaq gözəllik axtarırdıq. Amma indi o romantika yoxdur. Real yaşanan həyat var. Real yaşanan həyatın şərtlərinə uyğun davranmaq lazımdır. İndiki gənclərimiz, şagirdlərimiz, tələbələrimiz dünyanı bütün rəngləri ilə çox tez tanıyır. Onda da müəyyən mənada bəzi şeylər itir”.
Müsahibimiz bildirdi ki, indiki dövr uşaqlar üçün daha yaxşıdır: “Onlar bizim zamanı görməyiblər. Biz isə bunu da, onu da görmüşük. Ona görə də bizim üçün o zaman daha fərqli, daha ürəyimizəyatandır. Yəni daha təbii, bəzək-düzəksiz idi. Hislər, duyğular səmimi idi. Amma “o zaman yaxşı idi, indi pisdir” demək doğru deyil. Zaman, şərtlər, zövqlər, zamanın tələbləri dəyişdikcə insanların duyğuları, düşüncələri də dəyişir. Ona görə bugünkülər üçün yəqin bu gün gözəldir, yaxşıdır. Onlar haqlıdırlar, bu cür görürlər. Amma bizim üçün o zaman nostaljidir, keçmişdir. Yəni uşaqlıq, tələbəlik illərimizdir, ona görə o illər bizə daha doğma, daha əzizdir. O günlər üçün darıxırıq”.
Aktyor qeyd etdi ki, uşaqlıq illəri üçün çox darıxır: “Uşaqlığın, gəncliyin, atan, anan, itirdiyin insanlar üçün darıxırsan. Müəllimlərim üçün darıxıram, artıq əksəriyyəti dünyada deyil, onları gedib görə bilmirsən. Amma indikilər bizdən müəyyən mənada xoşbəxtdirlər ki, biz onda sovet imperiyasının şagirdləri, tələbələri idik. Amma bugünkülər müstəqil Azərbaycanın tələbələri, şagirdləridir. Öz üçrəngli bayraqları var. Bayraqlarını dolayırlar boyunlarına, ona sarılırlar. Bu mənada, onlar bizdən daha xoşbəxtdirlər. Amma onda biz imperiyanın tərkibində idik. Yəni haqqımızın və hüquqlarımızın sərhədləri var idi. Nə deyirdilər, o idi. Amma indi müstəqil Azərbaycan, dövlətimiz, öz bayrağımız var”.
Zərif Ülvizadə
Medianews.az