Media
“Son vaxtlar Xankəndi və ətraf bölgədə baş verən hadisələr rəsmi Bakının səbrinin tükəndiyini göstərir. Çünki bölgədə olan qanunsuz silahlı erməni dəstələrinin törətdiyi təxribatlar Azərbaycanın milli maraqlarını təhdid etməyə başlayıb. Üstəlik, Ermənistanın da səhnəarxasından bölgədəki erməni terrorçulara əlavə dəstək verməyə çalışdığı nəzərə çarpır”.
Bu sözləri siyasi şərhçi Elçin Xalidbəyli Medianews.az saytına açıqlaması zamanı bildirib. Onun sözlərinə görə, digər tərəfdən, Xankəndi və ətraf bölgədə müvəqqəti dislokasiya olunan Rusiya sülhməramlı qüvvələri də üçtərəfli anlaşmalarla qarşılarına qoyulan missiyanı yerinə yetirmirlər. Əksinə, rus sülhməramlılar bölgədə gərginliyin artırılmasında xüsusi rol oynamağa başlayıblar.
“Hətta rus sülhməramlıların komandanı, general Volkovun Xankəndi və ətraf bölgədə “qaranlıq biznes şəbəkəsi” qurduğu barədə məlumatlar da mövcuddur. İddia olunur ki, öz “qaranlıq biznes şəbəkəsi”ni daha genişləndirməyə çalışan general Volkov erməni separatçılarla yaxından işbirliyi qurub, onların təxribatlarına dəstək olur.
Təbii ki, rəsmi Bakı silahlı erməni terrorçuların təxribatlarını və rus general Volkovun fəaliyyətini diqqətlə izləyir. Artıq bütün “qırmızı cizgilər” aşıldığından rəsmi Bakı da buna adekvat olaraq, hərəkətə keçmək qərarı verib. Atəşkəs rejimini pozan qanunsuz erməni silahlı dəstələrinin mövqelərinə dəqiq zərbələr endirilir. Rəsmi Bakı bu qətiyyətli addımlarla həm erməni separatşılarına, həm də rus sülhməramlılarına Xankəndi və ətraf bölgənin Azərbaycana məxsus olduğunu növbəti dəfə xatırladır”.
Siyasi şərhçinin sözlərinə görə, rəsmi Bakının yalnız xatırlatma ilə kifayətlənəcəyi qətiyyən inandırıcı görünmür.
“Belə ki, rəsmi Bakı üçtərəfli anlaşmaların icrasında israrlı olduğunu qabarıq şəkildə biruzə verir. Çünki Rusiya sülhməramlı qüvvələri üçtərəfli anlaşmaların tələbinə baxmayaraq, qanunsuz erməni silahlı dəstələrinin Xankəndi və ətraf bölgədən çıxarılmasını hələ də təmin etməyiblər.
İndi rəsmi Bakı öz mövqeyini nisbətən sərtləşdirməklə, həmin terrorçu dəstələrin elə bölgədəcə məhv edilə biləcəyinin mesajını verir. Üçtərəfli anlaşmalara riayət etməyən Rusiya sülhməramlı qüvvələri isə Azərbaycanın bu istiqamətdə atacağı addımlara müqavimət göstərmək hüquqları yoxdur. Çünki Azərbaycan ordusu tezliklə məhz rus sülhməramlıların yerinə yetirmədiyi üçtərəfli anlaşmaların uyğun maddələrini icra etməyə başlayacaq.
Onu da qeyd etmək lazımdır ki, rəsmi Bakının beynəlxalq qurumlara son müraciəti Azərbaycanın antiterror əməliyyatlarına hazırlaşmasının əlaməti də sayıla bilər. Çünki bu müraciətlə rəsmi Bakı bütün dünyaya məlumat verdi ki, Ermənistan Azərbaycana qarşı işğalçılıq siyasətindən hələ də imtina etməyib. Ermənistanın Laçın dəhlizindən hərbi məqsədlərlə istifadə etməsi barədə qeyd də bu baxımdan, böyük əhəmiyyət daşıyır. Çünki bununla rəsmi Bakı Ermənistanın Azərbaycana məsxus Xankəndi və ətraf bölgəyə canlı qüvvə və hərbi yüklər, silah-sursat daşıdığını birmənalı şəkildə bəyan edir. Bu isə o deməkdir ki, Ermənistanın və bölgədəki erməni separatçıların hərbi məqsədlərlə istifadə etdikləri Laçın dəhlizinin Azərbaycan ordusu tərəfindən tezliklə nəzarət altına alına biləcəyi də qətiyyən istisna deyil.
Bütün bunlar onu göstərir ki, qanunsuz erməni silahlı dəstələrinin təxribatları, rus sülhməramlıların üçtərəfli anlaşmaların tələblərinə riayət etməməsi, Ermənistanın Laçın dəhlizindən hərbi məqsədlərlə istifadə etməsi rəsmi Bakını qətiyyətli addımlar atmaq məcburiyyətində buraxıb. Ona görə də, yaxın vaxtlarda Azərbaycanın daha radikal addımlar ata biləcəyi, hətta Xankəndi və ətraf bölgədə geniş antiterror əməliyyatına başlayacağı tamamilə inandırıcı görüntülər almaqdadır”.
Leyla
Medianews.az
