Xəbər verdiyimiz kimi, Tanınmış türkiyəli professor İlber Ortaylı vəfat edib.
Medianews.az-ın məlumatına görə, 78 yaşlı professor müalicə aldığı xəstəxanada həyatını itirib.
O, şəkərli diabet və böyrək çatışmazlığı diaqnozu ilə xəstəxanaya yerləşdirilmişdi və reanimasiyada müalicə alırdı.
Tarixçi alimin vəfatından sonra onunla bağlı videolar sosial mediada yayılır. Bu videolardan biri də onun Şəmkirə səfəri ilə bağlıdır. Türk tarixşünaslığının tanınmış simalarından biri, professor İlber Ortaylının Azərbaycanla, xüsusilə də Şəmkirlə qohumluq əlaqələrinin olduğu yenidən gündəmə gəlib. Belə ki, Ortaylının ana tərəfdən qohumlarının bir hissəsi Azərbaycanın Şəmkir rayonunun Təzəkənd kəndində yaşayır. Mənbələrin məlumatına görə, dünyaca məşhur alim Azərbaycanla, xüsusilə də Şəmkirlə bağlılığını müxtəlif müsahibələrində də vurğulayıb və bu bölgəni özünə doğma saydığını bildirib.
Qeyd olunur ki, İlber Ortaylı 2024-cü ilin oktyabr ayında Şəmkirə səfər edərək uzun illər görmədiyi qohumları ilə görüşüb. O, 25 ildən sonra xalası qızı Səadət xanım və digər yaxınları ilə bir araya gəlib.
Şəmkir ictimaiyyəti də böyük alimin vəfatı ilə bağlı dərin kədərini ifadə edib və onun ailəsinə, yaxınlarına, eləcə də bütün Türk dünyasına başsağlığı verib.
Qeyd edək ki, Osmanlı və Türk tarixi üzrə dünyanın ən nüfuzlu alimlərindən sayılan İlber Ortaylı 78 yaşında dünyasını dəyişib və uzun illər elmi fəaliyyəti ilə tarixşünaslığa böyük töhfələr verib.
Medianews.az