Moldovada yaşayan soydaşımız Ramiz Ansarov Orxey şəhərinin mer vəzifəsinə seçkilərinin ikinci turunda ilkin nəticələrə görə qalib gəlib.
Belə ki, mayın 31-də Orxey şəhərinin mer vəzifəsinə seçkilərin ikinci turunda seçicilərin 58 faizindən çoxu Ramiz Ansoravun lehinə səs verib.
O, mayın 17-də seçkilərin birinci turunda ən çox səs toplayan namizəd olub.
1987-ci ilin aprelin 12-də Kişineuda anadan olan R.Ansarov əslən Qərbi Azərbaycandandır, onun atası Barana (Noyemberyan) rayonunda anadan olub və böyüyüb. Sonradan ailəsi Bakı şəhərinə köçüb. R.Ansarov Moldovanın ictimai-siyasi həyatında fəallıq göstərir. O, həmçinin Moldova Azərbaycanlıları Konqresinin vitse-prezidenti kimi diasporumuzun inkişafına öz töhfəsini verir.
Musavat.com-un əməkdaşı R.Ansarovla əlaqə saxlayıb və həmyerliyimizin yeni vəzifədəki hədəfləri ilə bağlı söhbətləşib:
Ramiz bəy, ilk növbədə sizi mer seçilməyiniz münasibətilə təbrik edirik. Siz Moldovada anadan olmusunuz, lakin əcdadlarınız Qərbi Azərbaycandandır. İctimai-siyasi fəaliyyətlə nə vaxt məşğul olmağa başlamısınız? Siyasətə gəlməyinizin əsas motivi nə olub?
-Mənim üçün ətrafımda baş verənlərə laqeyd qalmamaq hər zaman vacib olub. İnsanların problemlərini görürdüm, ictimai təşəbbüslərdə iştirak edirdim, insanları faydalı layihələr ətrafında birləşdirirdim və əmin olurdum ki, hətta kiçik səylər belə real nəticələr verə bilər. Zaman keçdikcə anladım ki, siyasət müsbət dəyişikliklər etmək üçün daha geniş imkanlar yaradır. Mənim üçün bu, vəzifə uğrunda mübarizə deyil, insanlara fayda vermək və yerli icmanı inkişaf etdirmək imkanıdır. İşlədiyim illər ərzində idarəçilik təcrübəsi qazandım, güclü komandalar formalaşdırmağı və nəticə əldə etməyi öyrəndim. Buna görə də bu bilik və təcrübədən şəhərin inkişafı, həmçinin insanların həyatının yaxşılaşdırılması naminə istifadə etməyə qərar verdim.
Sizcə, siyasətdə uğur əldə etməyinizə və seçicilərin etimadını qazanmağınıza hansı keyfiyyətlər kömək edib?
-İnsanlar səmimiyyəti qiymətləndirirlər. Mən heç vaxt yerinə yetirə bilməyəcəyim vədlər vermirəm və hər zaman hamıya qarşı açıq olmağa çalışıram. Mənim üçün digər vacib prinsip insanlarla daim əlaqədə olmaqdır. Kabinetdə işləmək canlı ünsiyyəti əvəz edə bilməz. Buna görə də sakinlərlə mümkün qədər çox görüşməyə, onların təkliflərini dinləməyə və insanları həqiqətən narahat edən məsələləri anlamağa çalışıram. Mən hər zaman sözümün üstündə dayanır və başladığım işi sona çatdırıram. Hesab edirəm ki, məhz məsuliyyət, açıqlıq və insanlara hörmət etimad qazanmağa, eyni zamanda onu qoruyub saxlamağa kömək edir.
Siz Moldovanın ictimai-siyasi həyatında fəal iştirak edirsiniz. Bəs mer vəzifəsində qarşınıza qoyduğunuz əsas məqsəd və prioritetlər hansılardır?
-Əsas məqsədim Orxey şəhərini həyat keyfiyyətinə görə Moldovanın ən yaxşı şəhərinə çevirməkdir. Əminəm ki, bu, tamamilə real hədəfdir. Ölkənin digər şəhərləri üçün nümunə olmaq şansımız var. Bunun üçün yolların və nəqliyyat sisteminin yenilənməsinə, keyfiyyətli bələdiyyə xidmətlərinə və rahat şəhər mühitinin formalaşdırılmasına xüsusi diqqət yetirəcəyik. Mühüm prioritetlərdən biri investisiyaların cəlb edilməsi və yeni müəssisələrin yaradılmasıdır ki, bu da sakinlərimizi işlə təmin edəcək və şəhər büdcəsini artıracaq. Mən nəticə üçün işləməyə gəlmişəm və göstərilən etimadı hər bir Orxey sakininin görə biləcəyi konkret dəyişikliklərlə doğrultmaq niyyətindəyəm.
Şəhər sakinlərinin hansı problemlərini ən aktual hesab edirsiniz və onların həlli üçün hansı addımları atmağı planlaşdırırsınız?
-Yolların və səkilərin vəziyyəti, ictimai nəqliyyatın fəaliyyəti, yaşayış məhəllələrinin abadlaşdırılması kimi məsələlər aktualdır, lakin ən vacib məsələlərdən biri insanların doğma şəhərlərində işləmək və layiqli gəlir əldə etmək imkanına sahib olmalarıdır ki, qazanc dalınca başqa yerlərə getməyə məcbur qalmasınlar. Bu, bütün Moldova üçün ağrılı bir problemdir. Yerli hakimiyyət orqanlarının öz imkanları var, lakin vəziyyəti köklü şəkildə dəyişmək yalnız mərkəzi hakimiyyət orqanlarının iştirakı və beynəlxalq əməkdaşlıq sayəsində mümkündür.
Əhalinin həyat keyfiyyətinin yüksəldilməsi üçün yaxın illərdə konkret hansı layihələri həyata keçirməyi planlaşdırırsınız?
-Şəhərin inkişafı üzrə kompleks proqram təqdim olunacaq. Bu proqram çərçivəsində yol infrastrukturunun yenilənməsi, ictimai nəqliyyatın modernləşdirilməsi və idman infrastrukturunun inkişafı nəzərdə tutulur. Bələdiyyə xidmətlərinin rəqəmsallaşdırılmasına xüsusi diqqət ayrılacaq ki, sakinlər meriya ilə daha sürətli və rahat şəkildə əlaqə qura, öz məsələlərini asanlıqla həll edə bilsinlər.
Moldova Azərbaycanlıları Konqresinin vitse-prezidenti kimi Siz Azərbaycan diasporunun inkişafına da mühüm töhfə verirsiniz. Diasporumuzun daha da gücləndirilməsi və inkişafı istiqamətində yeni təşəbbüslər və ya layihələr həyata keçirməyi planlaşdırırsınızmı?
-Moldovadakı Azərbaycan diasporu fəal və yaxşı təşkilatlanmış diasporlardan biridir. Moldova Azərbaycanlıları Konqresinin vitse-prezidenti kimi deyə bilərəm ki, xalqımızın mədəniyyətini, adət-ənənələrini və dəyərlərini qoruyub saxlamağa, təbliğ etməyə nail oluruq. Biz milli bayramlar və anım tədbirləri keçirir, ölkənin ictimai, mədəni həyatında iştirak edirik. Bu illər ərzində Azərbaycan diasporu Moldova cəmiyyətində hörmət qazanıb və xalqlarımız arasında dostluğun möhkəmlənməsinə öz töhfəsini verib. Biz bu işi mütləq davam etdirəcəyik. Bizim üçün Moldova cəmiyyətinin bir hissəsi olmaqla yanaşı, öz köklərimiz və tarixi vətənimizlə bağlılığı qorumaq vacibdir.
Azərbaycan və Moldova arasında mövcud münasibətlərin hazırkı səviyyəsini necə qiymətləndirirsiniz? Sizcə, ölkələrimiz arasında əməkdaşlıq hansı sahələrdə daha da genişləndirilə bilər?
-Moldova Respublikası ilə Azərbaycan arasında münasibətlər ənənəvi olaraq dostluq və konstruktiv əməkdaşlıq xarakteri daşıyır. Bunu həm yüksək səviyyəli müntəzəm təmaslar, həm də müzakirə olunan məsələlərin məzmunu təsdiqləyir. Bu yaxınlarda Azərbaycan və Moldova prezidentləri Türkiyədə keçirilən böyük beynəlxalq tədbir çərçivəsində ikitərəfli görüş keçiriblər ki, bu da qarşılıqlı dialoqun yüksək səviyyədə olduğunu bir daha göstərir. Mənim fikrimcə, ölkələrimiz arasında əməkdaşlığın daha da inkişaf etdirilməsi üçün çox böyük potensial mövcuddur. Bu, energetika və iqtisadiyyatdan tutmuş mədəni, humanitar və təhsil sahələrində əməkdaşlığa qədər geniş istiqamətləri əhatə edir. Əminəm ki, yaxın illərdə Azərbaycan və Moldova arasında münasibətlərin möhkəmlənməsinə dair daha çox müsbət nümunələrin şahidi olacağıq.
Azərbaycanı ziyarət edirsinizmi?
-Təəssüf ki, Azərbaycanı istədiyim qədər tez-tez ziyarət etmək imkanım olmur, lakin orada baş verən bütün hadisələri diqqətlə izləyirəm. Azərbaycanın uğurlarına, inkişafına və ölkədə baş verən genişmiqyaslı dəyişikliklərə səmimi qəlbdən sevinirəm. Hər dəfə yeni nailiyyətlər və perspektivlər gördükdə əcdadlarımın torpağı ilə bağlı qürur hissi keçirirəm.
Dünyanın müxtəlif ölkələrində yaşayan azərbaycanlılara, eləcə də Azərbaycandakı oxucularımıza nə demək istərdiniz?
-Dünyanın müxtəlif ölkələrində yaşayan azərbaycanlılara arzu edirəm ki, onlar tarixi vətənlərini və mənsub olduqları xalqı hər zaman layiqincə təmsil etsinlər. Azərbaycandakı oxucularımıza isə demək istəyirəm ki, diaspora nümayəndələri öz köklərini heç vaxt unutmurlar. Biz yaşadığımız ölkələrdə Azərbaycan xalqının mədəniyyətinin, adət-ənənələrinin, tarixinin və nailiyyətlərinin tanınması, hörmətlə qarşılanması üçün əlimizdən gələni edirik. Harada yaşamasından asılı olmayaraq, azərbaycanlıları köklərimizə sevgi, tariximizə hörmət və yaşadığımız cəmiyyətə fayda vermək istəyi birləşdirir.