Meyvə və tərəvəzlərin düzgün saxlanmaması onların tez xarab olmasına və faydalı xüsusiyyətlərini itirməsinə səbəb olur. Mütəxəssislər bildirirlər ki, bəzi məhsulların birlikdə saxlanması xüsusilə risklidir və bu, gözləniləndən daha sürətli korlanmaya gətirib çıxarır.
Medianews.az Foodinfo.az-a istinadla xəbər verir ki, nutrisioloq Natalya Voytoviç məhsulların saxlanması ilə bağlı vacib məqamlara diqqət çəkib.
Onun sözlərinə görə, əsas problemlərdən biri meyvələrin ifraz etdiyi etilen qazıdır. Alma, banan, armud, avokado, şaftalı və pomidor yetişmə prosesində bu qazı aktiv şəkildə buraxır. Etilen insan üçün zərərli olmasa da, digər tərəvəzlərin tez xarab olmasına səbəb olur. Xüsusilə xiyar, brokkoli, kök, kartof və yaşıl yarpaqlı tərəvəzlər bu qazın təsirinə həssasdır və onlarla eyni yerdə saxlanmamalıdır.
Ekspert əlavə edir ki, bütün məhsullar soyuducu üçün uyğun deyil. Məsələn, pomidor və banan aşağı temperaturda dadını itirir və tez qaralır. Xiyar, bibər və badımcan isə daha mülayim temperaturda – təxminən +8…+10 dərəcədə daha uzun müddət təzə qalır. Kök bitkiləri isə işıqdan uzaq, sərin və qaranlıq mühitdə saxlanmalıdır, əks halda kartof kimi məhsullarda zərərli maddələr əmələ gələ bilər.
Bundan başqa, plastik torbalar məhsulların saxlanması üçün uyğun hesab olunmur. Qapalı mühitdə yaranan rütubət çürüməni sürətləndirir. Mütəxəssis nəfəs alan parça torbalardan istifadə etməyi tövsiyə edir. Yaşıl göyərtilərin isə əvvəlcədən yuyulub nəm dəsmala bükülərək soyuducunun orta rəfində saxlanması onların daha uzun müddət təravətli qalmasına kömək edir.