Dondurulmuş məhsullar gündəlik qidalanmada tez-tez istifadə olunsa da, onların keyfiyyəti birbaşa sağlamlığa təsir göstərə bilər. Mütəxəssislər bildirirlər ki, yanlış seçilmiş dondurulmuş qidalar zəhərlənmə riskini artıra bilər.
Medianews.az Foodinfo.az-a istinadla xəbər verir ki, həkim-diyetoloq Natalya Mizinova mağazada dondurulmuş məhsul alarkən diqqət edilməli əsas məqamları açıqlayıb.
Onun sözlərinə görə, məhsulun keyfiyyətini müəyyən edən əsas göstərici qablaşdırmanın bütöv və oxunaqlı olmasıdır. Bu, məhsulun daşınma və saxlanma zamanı ərimədiyini göstərən ilk vizual əlamət sayılır. Qablaşdırması cırılmış, üzərindəki yazıları silinmiş və ya deformasiya olunmuş məhsulların alınması tövsiyə edilmir.
Mütəxəssis qeyd edib ki, məhsulu seçərkən qablaşdırmanı yüngülcə silkələmək də faydalıdır. Əgər içəridə çoxlu buz və ya qar qırıntıları hiss olunursa, bu, məhsulun yenidən dondurulduğuna işarə ola bilər. Xüsusilə tökmə şəkildə satılan dondurulmuş məhsullarda qırılma və yapışma əlamətlərinə diqqət yetirilməlidir.
Həkimin sözlərinə görə, əsas risklər adətən istehsal mərhələsində deyil, sonrakı mərhələlərdə — daşınma və satış zamanı yaranır. Çünki istehsalatda məhsullar adətən düzgün və sürətli dondurma üsulu ilə hazırlanır.
Xüsusilə isti aylarda daşınma zamanı nasaz soyuducu nəqliyyat vasitələrinin istifadəsi və mağazalarda dondurucuların gecə saatlarında söndürülməsi məhsulun keyfiyyətini aşağı sala bilər. Bu cür hallar daha çox dondurma və yarımfabrikat məhsullarda müşahidə olunur.
Mütəxəssis xəbərdarlıq edib ki, dondurulmuş məhsulların əriməsi və yenidən dondurulması bakteriyaların çoxalmasına şərait yaradır. Bu isə qida zəhərlənməsi riskini artırır. Buna görə də istehlakçılara alış zamanı diqqətli olmaq və şübhəli görünən məhsullardan uzaq durmaq tövsiyə olunur.
