Peyk görüntüləri şəhərin hər ay 1,3 santimetr batdığını təsdiqləyib.
Mexiko şəhəri elə sürətlə batır ki, bu dəyişiklikləri artıq orbitdəki peyklər aydın şəkildə qeydə anır.
CNN-in məlumatına görə, son məlumatlar 22 milyon sakinin ayaqları altında kritik çökmənin olduğunu göstərir.
Vəziyyət o qədər ciddiləşib ki, onun miqyası NASA-nın güclü radar sistemi vasitəsilə qiymətləndirilib. Şəkillər göstərir ki, şəhər ayda təxminən 1,3 santimetr batır. Bu, rəsmi olaraq Mexiko şəhərini planetin ən sürətlə batan paytaxtlarından birinə çevirir.
Qeyd olunur ki, fəlakətin əsas səbəbi dərin yeraltındadır. Metropoliten qədim bir göl və su hövzəsinin yerində yerləşir və şəhər içməli suyunun təxminən 60 faizini oradan alır. Həddindən artıq resurs istehlakı səbəbindən yeraltı boşluqlar sıxılır və torpaq sözün əsl mənasında çökməyə başlayır. Vəziyyəti yumşaq gilin üzərinə basan yeni binaların böyük çəkisi daha da ağırlaşdırır.
Yollar artıq çatlayır, binalar əyilir və dəmir yolu relsləri uçur. Müstəqillik Mələyi abidəsi buna bariz nümunədir. Medianın məlumatına görə, tikildiyi vaxtdan bəri ətrafındakı torpaq daim çökdüyü üçün onun təməlinə çatmaq üçün 14 pilləkən quraşdırılmalı olub.
NISAR peykindən əldə edilən məlumatlara görə, Benito-Xuares Beynəlxalq hava limanı da daxil olmaqla, şəhərin müəyyən əraziləri 2025-ci ilin oktyabr ayı ilə 2026-cı ilin yanvar ayı arasında ayda 2 santimetr çöküb. Bu, ildə 24 santimetrdən çoxdur.
NISAR layihəsi mütəxəssislərinin qeyd etdiyi kimi, bu rəqəmlər daha böyük kəşflərin yalnız başlanğıcıdır. Torpağın sürətlə çökməsi təkcə infrastrukturu məhv etməklə yanaşı, həm də şəhəri içməli su təchizatının əbədi olaraq tükənə biləcəyi "sıfır günü"nə yaxınlaşdırıb./Lent.az