Gündəlik həyatın intensiv tempi və zehni yüklənmə beyin fəaliyyətinə birbaşa təsir göstərir, buna görə də düzgün qidalanma bu sahədə mühüm rol oynayır. Mütəxəssislər bildirirlər ki, bəzi qida maddələri zehni aktivliyi artıraraq diqqət və yaddaşı gücləndirə bilər.
Medianews.az Foodinfo.az-a istinadla xəbər verir ki, dietoloqlar beyin fəaliyyətinin yaxşılaşdırılması üçün omega-3 yağ turşularını xüsusi vurğulayırlar.
Omega-3 yağ turşuları sinir hüceyrələrinin fəaliyyətini dəstəkləyir, beyin funksiyalarını aktivləşdirir və ümumi məhsuldarlığı artırır, eyni zamanda görmə qabiliyyətinə də müsbət təsir göstərir. Bu maddə xüsusilə kompüter qarşısında uzun müddət çalışan şəxslər üçün faydalıdır, çünki göz yorğunluğunu azaldır və “quru göz” sindromunun qarşısını almağa kömək edir. Mütəxəssislər qeyd edirlər ki, bu faydalı komponentin müntəzəm qəbulu həm də maddələr mübadiləsini aktivləşdirir.
Omega-3 ilə zəngin məhsullar arasında yağlı dəniz balıqları – skumbriya, siyənək və qızılbalıq xüsusi yer tutur, çünki bu balıqlar ən yüksək faydalı yağ tərkibinə malikdir. Bundan əlavə, dəniz məhsulları, avokado, qoz və kətan yağı da bu baxımdan olduqca qiymətli hesab olunur və gündəlik rasiona daxil edilməsi tövsiyə edilir. Bu qidaların balanslı şəkildə istifadəsi beyin fəaliyyətinin gücləndirilməsinə, yaddaşın yaxşılaşmasına və ümumi sağlamlığın qorunmasına mühüm töhfə verir.