Rəsmi işi olmayanlar da kredit ala bilərmi? - Ekspertdən vacib açıqlama

Rəsmi gəlir olmadan kredit almaq mümkündürmü? Rəsmi gəliri olmayan, lakin maliyyə çətinliyi ilə üzləşən şəxsləri ən çox düşündürən məsələlərdən biri də kredit əldə etmək imkanlarıdır. Hazırkı qanunvericiliyə əsasən, bank və kredit təşkilatları borcalanın rəsmi gəlirə sahib olmasını əsas şərt kimi irəli sürürlər. Bəs görəsən, rəsmi iş yeri olmayan şəxslərin kredit almaq şansı varmı? İqtisadçı ekspert Asif İbrahimov Medianews.az-a açıqlamasında bildirib ki, hər hansı bir kredit üçün müraciət edən şəxslə bağlı banklarda risklərin qiymətləndirilməsi aparılır və bu məqsədlə xüsusi struktur bölməsi fəaliyyət göstərir. “Şəxsin götürəcəyi kreditin geri qaytarılma imkanları, yəni ödəmə qabiliyyəti araşdırılır. Əsas meyarlardan biri həmin şəxsin rəsmi iş yerinin olub-olmamasıdır. Bununla belə, mövcud qanunvericilikdə elə hallar da var ki, məsələn, istehlak kreditləri və ya biznesin genişləndirilməsi, investisiya məqsədilə götürülən kreditlər üçün də müəyyən şərtlər müəyyənləşdirilib. Elə hallar olur ki, şəxs rəsmi işləmir, lakin gəlir mənbəyi var və bu da nəzərə alınır,” – deyə ekspert qeyd edib. Onun sözlərinə görə, yeni qanunvericilikdə təkcə rəsmi gəlirlər deyil, qeyri-rəsmi gəlirlərin də müəyyənləşdirilməsi üçün sosial şəbəkə hesablarının təhlilinə də yer verilir: “Bu gün bəzi banklar artıq belə təcrübədən istifadə edir. Yəni, bu istiqamətdə addımlar atılır”. Oğuz Ayvaz