"Vladimir Medinski iki qəbahətə yol verib" – AÇIQLAMA

“Rusiya-Ukrayna müharibəsini Qarabağla yalnız bir aspektdə müqayisə etmək olar, o da Rusiyaya sərf etməz”. Politoloq Aydın Quliyev Rusiya prezidentinin köməkçisi Vladimir Medinskinin Rusiya-Ukrayna müharibəsini Qarabağla müqayisə etməsinə münasibət bildirərkən belə deyib.   Politoloq Medianews.az-a açıqlamasında deyib ki, Medinski iki qəbahətə yol verib: “Birincisi, Dağlıq Qarabağa mübahisəli ərazi deyib. İkincisi, Rusiya-Ukrayna müharibəsini Qarabağdakı vəziyyətlə müqayisə edib... Adam bu səviyyədə bilgilərlə Rusiya-Ukrayna danışıqlarında Rusiya heyətinin rəhbərliyini də aparır, hara aparır, Allah bilir... Adam elə bu gündədir ki, ABŞ prezidenti Donald Tramp açıq-aşkar “Biz onun Ukrayna danışıqlarında iştirakını istəmirik” demişdi. Gələk Qarabağ mövzusuna... Medinski Rusiya-Ukrayna müharibəsinin Qarabağla müqayisəsinin yolverilməz olduğunu niyə bilmir, ya bilmək istəmir, onun işidir. Biz isə həqiqəti belə deyirik: keçmiş Qarabağ münaqişəsi yalnız bir aspektdə Rusiya-Ukrayna müharibəsi ilə müqayisə edilə bilər - hər iki halda ortada təcavüz, işğal faktı var və var idi. Bir halda Ermənistan Azərbaycanın ərazilərinə təcavüz etmiş, torpaqları işğal etmişdi, digər halda Rusiya Ukraynaya təcavüz edib və Ukrayna torpaqlarını işğal edib. Vəssalam!” Toğrul Əli, Medianews.az