Hava proqnozu: Şimal axınının sərt dalğası gözlənilir

“İnstagram” sosial şəbəkəsində dəqiq proqnozları ilə diqqət çəkən “Weather_man_aze” hesabında növbəti hava proqnozu yayılıb. Medianews.az-ın məlumatına görə, proqnozda deyilir ki, Qütb axını 10 günlük fəaliyyətdən sonra aprelin 18-i gecə ölkəmizi tərk edəcək. Bu axını Mərkəzi Asiyadan gələn Cənub və Cənub/Şərq axınları əvəz edəcək. Mərkəzi Asiya axını nəticəsində ölkə ərazisində sabitlik yaranacaq. Temperatur tədricən 5-8 dərəcə artacaq. Bakı və Abşeronda aprelin 19-u Günəş görünsə də Şimal küləyi əsəcək. (15m/s) Cənub axınları zamanı isə arabir Cənub küləkləri güclənəcək. Hələ ki, aprel ayında anomal istilər gözlənilmir. Aranda temperatur +22+25, Bakıda +20+22, dağlıq bölgələrdə +17+22 dərəcə arasında dəyişəcək. Mərkəzi Asiya axınının ömrü cəmi üç gün çəkəcək. Aprelin 22-dən ölkə ərazisinə daxil olacaq ardıcıl Şimal axınları Cənub axınlarını qovaraq, istilərin anomal həddə çatmasına imkan verməyəcək. Şimal axınlarının ilk cəhdi nisbətən zəif olsa da, Qarabağ, Qərb, Şimal/Qərb və Şimal bölgələrinin müxtəlif ərazilərində yağış yağacaq. Üçüncü ongünlüyün ortasında Şimal axınının nisbətən sərt dalğası gözlənilir. Aprel ayı qeyri-sabit ay kimi davam edəcək. Bu ayda ciddi anomal istilər gözlənilmir. Temperatur bundan sonra elə yaz fəslinə uyğun, Şimal axınları zamanı isə daha aşağı olacaq. Medianews.az