Məşhur aparıcıdan və həyat yoldaşından dəhşətli yanğınla bağlı PAYLAŞIM

Bolu Kartalkaya xizək mərkəzində 79 nəfərin həyatını itirdiyi hoteldə baş verən yanğından sonra türkiyəli məşhur aparıcı Zuhal Topalın əri Korhan Saygıner Fransada xizək hotellərindən birindən etdiyi paylaşım ilə diqqət çəkib. Medianews.az xəbər verir ki, Korhan Saygıner hoteldən çəkdiyi videonu sosial media hesabında paylaşıb. "Hazırda Fransada qaldığım xizək hotelində otağımdan çıxarkən təsadüfən çəkdiyim bir videonu sizinlə paylaşıram. Yanğınsöndürəndən yanğın diaqramına, qaçış qapılarından geniş yanğın nərdivanlarına, siqnal düymələrindən tutmuş yanğın şlanqına qədər hər şey lazım olduğu kimidir",-deyə K.Saygıner paylaşımında bildirib. Qeyd edək ki, məşhur aparıcı Zuhal Topalın qızının dostu və ailəsi də dəhşətli yanğında həlak olublar. Zuhal Topal da hadisə ilə bağlı paylaşım edərək bunları yazıb: “Brilyant ürəkli Elifimizi və həyat sevinci ilə dolu əziz dostumuz Ebrumuzu əlimizdən alan məsuliyyətsiz, vicdansız, amansız insanların Allah cəzasını versin. Allah hər kəsə bu ağrıya dözmək gücü versin. Ümid edirik ki, fəlakətin günahkarları dərhal ən ağır cəzanı alacaqlar”. Medianews.az