Azərbaycanın iqtisadi və siyasi mərkəzi olan Bakı şəhəri son illərdə sürətli urbanizasiya və əhali artımının gətirdiyi ən böyük çətinliklərdən biri — xroniki nəqliyyat tıxacları ilə mübarizə aparır. Paytaxtın əsas prospektlərində həm səhər, həm də axşam saatlarında müşahidə olunan iflic vəziyyəti artıq sadəcə vaxt itkisi deyil, həm də ciddi iqtisadi və ekoloji problemə çevrilib. Şəxsi avtomobillərin sayındakı kəskin artım, ictimai nəqliyyatın bəzi sahələrdəki qeyri-effektivliyi və metro şəbəkəsinin şəhərin bütün nöqtələrini əhatə etməməsi vətəndaşları fərdi nəqliyyata yönəldir. Bu zəncirvari reaksiya isə şəhərin yol infrastrukturunun imkanlarını üstələyən bir yük yaradır.
Medianews.az xəbər verir ki məsələ ilə bağlı NOCOMMENT.az–a danışan nəqliyyat eksperti Yasin Mustafayev bildirib ki, tıxac probleminin həlli üçün beynəlxalq təcrübədə sınaqdan keçmiş daha radikal və iqtisadi tənzimləmə metodlarının tətbiqi gündəmdədir. Ekspertin sözlərinə görə, şəhərə giriş-çıxış rejimi ilə bağlı müəyyən yeni mexanizmlərin qurulması qaçılmaz görünür: “Şəhərə giriş-çıxışla bağlı müəyyən ideyalar səsləndirilir və böyük ehtimalla bu, yaxın gələcəkdə tətbiq ediləcək. Ya konkret müxtəlif sıxlıq olan ərazilərə, ya da ümumiyyətlə paytaxtın mərkəzi hissələrinə giriş-çıxış ödənişli əsaslarla tənzimlənə bilər”.
Ekspert vurğulayıb ki, bu addım hər hansı bölgə insanını hədəf almaq məqsədi daşımır, əksinə nəqliyyat axınını optimallaşdırmağa xidmət edir: “Burada ‘rayon qeydiyyatı’ məsələsini qabardıb insanları qıcıqlandırmaq düzgün yanaşma deyil. Söhbət ümumi avtomobil yükünün azaldılmasından gedir. Əgər bir avtomobil şəhərdən çıxıb yenidən Bakıya qayıtmaq istəyəcəksə, o zaman müəyyən ödəniş etməli olacaq. Bu metod dünyanın bir çox böyük metropollarında mərkəzi hissələrdəki yüklənməni azaltmaq üçün effektiv vasitə kimi istifadə olunur”.
Yasin Mustafayevin qənaətinə görə, ödənişli giriş sistemi vətəndaşları daha çox ictimai nəqliyyatdan istifadəyə təşviq edə bilər. Lakin bununla paralel olaraq, alternativ nəqliyyat vasitələrinin keyfiyyətinin artırılması da mütləqdir: “Tıxac problemini yalnız qadağalarla deyil, həm də iqtisadi rıçaqlarla həll etmək olar. Şəhərin mərkəzinə fərdi avtomobillə daxil olmağın maliyyə yükü artdıqca, insanlar avtobus və metro xidmətlərinə daha çox maraq göstərəcəklər. Bu, həm ekoloji vəziyyətin yaxşılaşmasına, həm də yollardakı hərəkət intensivliyinin normal səviyyəyə düşməsinə kömək edən strateji bir addımdır”.