Media
Bəşəriyyət gün keçdikcə daha çətin şərtlərlə üzləşir. Dünyada gedən proseslər ətraf mühitin çirklənməsinə, qlobal quraqlığa, havanın çirklənməsinə səbəb olur. Ekologiyamızın təhlükə altında olması həyatımız üçün təhdiddir. Fabriklərin, avtomobillərin atmosferə buraxdığı zərərli tüstülər ciyərlərimizə aldığımız havanı çirkləndirir. Elm adamları çirklənmənin qarşısını almaq üçün addımlar atsa da, kifayət qədər təsirini görmürük. Dünyamızı qorumaq üçün ətraf mühiti təmiz saxlamalı, havanı çirkləndirən hər şeydən imtina etməliyik.
Havanı çirkləndirən avtomobilləri təmiz enerji ilə işləyənlərlə əvəz etsək, ekologiyaya müsbət təsir etmiş olarıq. Lakin ətrafa nəzər salsaq, görərik ki, təmiz enerji ilə işləyən avtomobillərin istifadəçisi daha azdır. Əksəriyyət daxili yanma mühərrikli avtomobillərə üstünlük verir.
İnsanların təmiz enerji ilə işləyən avtomobillərdən daha az istifadə etməsinin səbəblərini Medianews.az-a ekoloq Cəmşid Quliyev açıqlayıb. O bildirib ki, elektromobillərə marağın azlığı insanların sosial vəziyyəti ilə əlaqəlidir:
“Əhalinin imkanı təmiz enerji ilə işləyən avtomobil almağa çatmır. Çünki hibrid avtomobillər daxili yanma mühərriki ilə işləyənlərdən bahalıdır. Qiymətlərə baxarkən bunu aydın şəkildə görürük. Bu səbəbdən insanlar daha az xərc tutan avtomobillərə üstünlük verirlər. Gərək o avtomobillərin qiyməti aşağı salınsın ki, alıcı sayı çoxalsın. Elektromobillər gündəmdə saxlanılmalıdır. Dünya ekologiyası üçün bu vacibdir”.
Ekoloq daxili yanma mühərriki ilə işləyən avtomillərə texniki baxışın dəqiq aparılmadığını da qeyd edib:
“Daxili yanma mühərrikləri ilə işləyən avtomobillərin ətraf mühitə vurduğu ziyan bəllidir. Ziyanın həcmi avtomobilin texniki sazlıq səviyyəsindən də asılıdır. Ölkəmizdə texniki baxış dəqiq aparılmır. Bir çox hallarda səlahiyyətli məmurlar bu sahəni korrupsiya ala biləcəkləri yer kimi görür. Ona görə də texniki baxış sadəcə formal xarakter daşıyır. Əslində baxış düzgün şəkildə həyata keçirilsə, çirklənmənin qarşısını nisbətən ala bilərik. Amma yenə də daxili yanma mühərriki ilə işləyən avtomobillər ətraf mühitə müəyyən qədər zərər verir. Ona görə də hibrid və ya bütünlüklə elektriklə işləyən mühərriklərə keçid vacibdir. Ekologiyanı qorumaq təkcə bizim ölkəmizdən asılı olan məsələ deyil. Çünki hava sərhəd tanımır. Çirkli hava başqa ölkələrdən bizə gəlir, bizdən də başqa ölkələrə gedir. Hər kəs öz payına düşən addımı atmalıdır”.
Xanlar Əlibəy
Medianews.az
