Xüsusilə Avropada yoluxanların sayının sürətlə artması ilə narahatlığa səbəb olan meymun çiçəyi virusu epidemiyası Ümumdünya Səhiyyə Təşkilatı (ÜST) ilə Afrika ölkələri arasında gərginliyə səbəb olub.
Medianews.az xəbər verir ki, ÜST bu gün meymun çiçəyi virusunu “təcili qlobal sağlamlıq böhranı” elan edib-etməyəcəyini açıqlayacaq. Digər tərəfdən bu vəziyyət meymun çiçəyi virusunun qitədə illərdir böhran olduğunu bildirən afrikalı alimlərin reaksiyasına səbəb olub.
Məlumata görə, Covid-19 qədər asan yayılmasa da, meymun çiçəyi virusu endemik olduğu Afrikadan kənarda da yayılaraq 40-dan çox ölkədə aşkarlanıb. Afrikadan kənarda yoluxmaların sayı 3000-ə çatıb.
Bildirilir ki, Afrikada bu xəstəliyə yoluxma halları son illərdə sürətlə artır. Bu ilin əvvəlindən qitədə aşkar edilən şübhəli halların sayı 1500-ü ötüb, onlardan 66-nın ağır olduğu bildirilir.
Qeyd edək ki, insanlarda meymun çiçəyi xəstəliyi ilk dəfə 1970-ci ildə Konqo Demokratik Respublikasında qeydə alınıb.
Leyla, Medianews.az