Media
Ümumdünya Səhiyyə Təşkilatının (ÜST) alimləri iyunun 23-də meymun çiçəyi virusunu narahatlıq doğuran ictimai səhiyyə fövqəladə hadisəsi kimi nəzərdən keçirəcəklər.
Medianews.az xəbər verir ki, ÜST indiyədək 39 ölkədə 1600 meymun çiçəyi xəstəliyinin aşkar edildiyini və 1500 şübhəli yoluxmanın olduğunu açıqlayıb. Məlumatda bildirilib ki, bu günə qədər virusa görə insan itkisi qeydə alınmayıb.
Ümumdünya Səhiyyə Təşkilatının Baş direktoru Tedros Gebreyesus bildirib ki, Qlobal meymun çiçəyi virusu olduqca qeyri-adi və həyəcanvericidir. Digər tərəfdən, ÜST-nin Fövqəladə Hallar üzrə Direktor müavini İbrahim Soce Fall, virusun Avropada yayılma sürətinin yüksək, dünyanın qalan hissəsində isə orta səviyyədə olduğunu söyləyib. Fall, virusun necə yayıldığına dair hələ də məlumat çatışmazlığının olduğunu vurğulayıb.
Cenevrədə keçirilən mətbuat konfransında çıxış edən ÜST-nin çiçək xəstəliyi üzrə mütəxəssisi Rosamund Lewis, meymun çiçəyi virusunun bəzən yüngül simptomlar göstərdiyini və yoluxuculuğunun iki ilə dörd həftəyə qədər davam edə biləcəyini bildirib. “İnsanların özlərini bu qədər uzun müddət təcrid etmələrinin çox çətin olduğunu bilirik, lakin başqalarını qorumaq çox vacibdir. Əksər hallarda insanlar özlərini evdə təcrid edə bilir və xəstəxanaya getməyə ehtiyac duymurlar”,-deyə qeyd edib.
Qeyd edək ki, mütəxəssislər virusun yaxın təmas nəticəsində keçdiyini düşünürlər. Bildirilir ki, virus başqalarına paltar, çarpayı və çarşaf, dəsmal və qab-qacaq vasitəsilə keçə bilər.
Leyla, Medianews.az
