Bu meyvələrdən yeyənlərin dişi ağappaq olur

Dişlərin bəyazlığı üçün hər zaman bahalı stomatoloji prosedurlara ehtiyac qalmır. Bəzən gündəlik qida rasionuna edilən kiçik əlavələr təbəssümün daha parlaq görünməsinə kömək edir.

Demokrat.az xəbər verir ki, mütəxəssislər diş minasını təbii yolla təmizləyən və ləkələri aparan beş əsas məhsulu açıqlayıblar. Siyahıda ilk yeri alma tutub. Stomatoloq Loren Bekkerin sözlərinə görə, almanın tərkibindəki alma turşusu dişləri ağardır və ağız suyunu artıraraq minanı qoruyur. Eyni turşuya üzüm və sitrus meyvələrində də rast gəlmək olar.

Ananasın tərkibindəki bromelayn fermenti isə diş səthindəki ləkələri parçalamaq xüsusiyyətinə malikdir. Lakin həkim Natan Ouks xəbərdarlıq edir ki, bu təsir yalnız təzə meyvələrə aiddir, konservləşdirilmiş ananaslarda həmin ferment məhv olur.

Tərəvəzlər arasında kərəviz və kök "təbii aşındırıcı" rolunu oynayır. Bu qidaların lifli və xırçıldayan teksturası çeynəmə zamanı diş ərpini mexaniki olaraq təmizləyir. Kök həmçinin tərkibindəki A vitamini ilə minanı gücləndirir, diş ətlərini masaj edir.

Siyahıda sonuncu yeri şəkərsiz saqqızlar tutur. Stomatoloq Şon Kutley yeməkdən sonra beş dəqiqə saqqız çeynəməyi tövsiyə edir. Bu, ağız boşluğunda turşuluğu azaldaraq minada mikroçatların yaranmasının qarşısını alır və qida piqmentlərinin dişin daxilinə nüfuz etməsinə mane olur.