Bəhram Bağırzadədən sensasion təklif: “Bugünkü hava şəraitini görəndə...”

Əməkdar artist Bəhram Bağırzadə Medianews.az saytına açıqlamasında qeyri-adi təkliflə çıxış edib. O, Medianews.az-a açıqlamasında öncə xatırladıb ki, neçə il qabaq ümumtəhsil məktəblərinin tədris proqramlarına belə vacib bir fənnin — şahmatın daxil edilməsini israrla təklif edirdi: “Axı məhz şahmat məntiqi düşüncəni və strateji düşünmək qabiliyyətini, addımları qabaqcadan hesablamaq vərdişini mükəmməl şəkildə inkişaf etdirir. Növbəti təklifim isə Azərbaycan rəqsləri dərslərinin keçirilməsi oldu. Təəssüf ki, müasir nəsil milli mədəniyyətimizin ənənəvi rəqslərini demək olar ki, unudub. Əcdadlarımızın zərif hərəkətləri əvəzinə bir çox gənclər Afrika üslublarına bənzəməyə çalışır, beşinci nöqtəni (çanağı) yuxarı qaldıraraq, tamamilə uyğunsuz və estetik baxımdan xoş görünməyən hərəkətlər edirlər. Bundan əlavə, mən dəfələrlə təsviri incəsənət və rəsm dərslərinin vacibliyini vurğulamışam. Axı incəsənətlə məşğul olmaq beyin yarımkürələrinin hər ikisinin inkişafına, bədii zövqün və gözəllik duyumunun formalaşmasına kömək edir. Bununla yanaşı, mən əminəm ki, uşaqların kollektiv yaradıcılığı öyrənməsi də çox vacibdir. Onların xor çıxışlarında iştirak etməsi bu baxımdan əhəmiyyətlidir. Biz muğamın fərdi ifasına öyrəşmişik — solistlər ustalıqla bacarıqlarını nümayiş etdirir, musiqiçilər onları müşayiət edir. Lakin əsl mədəniyyət həm də birləşməyi bacarmaq, digər iştirakçıların səsləri ilə harmoniya hissini yaşamaq və ümumi səslənmənin dəyərini anlamaqdır”. Sonda Bəhram Bağırzadə deyib: “Bugünkü pis hava şəraitini müşahidə edərkən düşündüm ki, məktəblərdə məcburi üzgüçülük dərslərinin keçirilməsinə böyük ehtiyac var. Bu, suda baş verən bədbəxt hadisələrin sayını xeyli azalda bilər, uşaqlarımızın demək olar ki, şəhərin mərkəzində boğulmaq təhlükəsindən qorunmasına və hər bir ailənin gələcəyini təhlükə altına atan faciələrin qarşısının alınmasına kömək edə bilər”. Toğrul Əli, Medianews.az