UEFA ABŞ millisinin hücumçusu Folarin Baloqunun cəzasının ləğvi ilə bağlı FİFA-nın qərarını sərt tənqid edib.
Medianews.az xəbər verir ki, UEFA bununla bağlı rəsmi bəyanat yayıb.
Qeyd edək ki, Baloqun DÇ-2026-nın 1/16 finalında Bosniya və Herseqovina ilə oyunda (2:0) qırmızı vərəqə almışdı. Lakin FİFA-nın İntizam Komitəsi futbolçunun avtomatik bir oyunluq cəzasını dayandıraraq onu 1 illik sınaq müddəti ilə əvəz edib. Bu qərar hücumçuya Belçikaya qarşı 1/8 final matçında oynamaq imkanı verib.
UEFA isə bunun qaydalara zidd olduğunu bildirib:
“Dünən diskvalifikasiyanın dayandırılması və onun 1 illik sınaq müddəti ilə əvəzlənməsi qırmızı xəttin keçilməsi oldu. Futbol, digər idman növləri kimi, ədalətli, açıq və şəffaf rəqabəti təmin edən qaydalara əsaslanır.
Bəzi hallarda qaydalar müxtəlif cür şərh oluna bilər. Ancaq bu vəziyyətdə yox. Qırmızı vərəqədən sonra minimum bir oyunluq avtomatik diskvalifikasiya müzakirə mövzusu deyil və onun qüvvəyə minməsi üçün ayrıca qərar tələb olunmur”.
UEFA bu addımı “presedentsiz və əsassız qərar” adlandırıb:
“Bu prinsip turnirin reqlamentində təsbit olunub və heç bir istisnaya yol vermir. Xüsusilə də turnirin gedişində, oxşar vəziyyətdə olan digər futbolçular cəzalarını çəkdiyi halda. Qaydalara əməl olunmasına cavabdeh olanlar onların dəyişməzliyini təmin etmədikdə, oyunun ədalətliliyi və turnirə olan etimad təhlükə altına düşür. Bu presedentsiz, anlaşılmaz və əsassız qərarla bağlı dərin təəccübümüzü ifadə edirik.”
Qeyd edək ki, ABŞ millisi 1/8 finalda Belçika ilə qarşılaşacaq. Daha əvvəl Belçika Futbol Assosiasiyasının da FİFA-nın qərarından apellyasiya şikayəti verməyi nəzərdən keçirdiyi bildirilmişdi./Qol.az