Bir çox insan səhvən hesab edir ki, saç ustasına getməkdən tam imtina etmək saçların daha tez uzanmasına kömək edir. Lakin mütəxəssislərin fikrincə, saç uclarının mütəmadi kəsilməsi əslində saçın sağlamlığını və sıx görünüşünü qorumaq üçün vacib amillərdən biridir.
Medianews.az Lent.az-a istinadən xəbər verir ki, saç kəsimi birbaşa uzanma sürətini artırmır, çünki saçlar uclardan deyil, köklərdən uzanır. Ancaq ucların vaxtında kəsilməsi saçın qırılmasının və haçalanmasının qarşısını alır. Əks halda, zədələnmiş uclar yuxarı doğru yayılaraq saçın uzunluğunun “seyrəlmiş” və baxımsız görünməsinə səbəb olur.
Mütəxəssislər bildirirlər ki, saç kəsdirmə tezliyi məqsədə və saçın vəziyyətinə görə dəyişir. Saç uzatmaq istəyənlər üçün hər 10-12 həftədən bir ucların kəsilməsi tövsiyə olunur. Boyanmış saçlar daha tez zədələndiyi üçün bu interval 6-8 həftəyə qədər qısaldıla bilər. Dalğalı və ya buruq saçlarda isə quruluşuna görə 3 aya qədər fasilə vermək mümkündür. Qısa saç modellərində isə formanı qorumaq üçün hər 1-1,5 aydan bir yenilənmə vacib sayılır.
Saç köklərinin həqiqətən güclənməsi və uzanmanın stimullaşdırılması üçün isə əsas diqqət qidalanmaya və baş dərisinə qulluq edilməsinə yönəldilməlidir. Zülal və dəmir baxımından zəngin qidalar qəbul etmək, eyni zamanda baş dərisinə müntəzəm masaj etmək daha effektiv nəticə verir. Bundan əlavə, fen və ütü kimi istilik verən cihazlardan az istifadə etmək də saçın sağlam qalmasına kömək edir.