Belarus Prezidenti Aleksandr Lukaşenko noyabrın 28-də Omana səfər edib.
Medianews.az qeyd edir ki, Belarusun rəsmi mediasında bunun işgüzar səfər olduğu, Lukaşenkonun Oman Sultanı Heysəm bin Tariq Al Səidlə görüşünün nəzərdə tutulduğu bildirilib.
Rəsmi xəbərdə diqqətə çatdırılıb ki, son vaxtlar iki ölkə arasında əməkdaşlıq intensivləşib, qarşılıqlı səfərlər artıb, 2024-cü ildə Lukaşenkonun Omana səfəri zamanı müəyyənləşmiş perspektiv istiqamətlər inkişaf etdirilib, 2025-ci ilin oktyabrında Sultan Heysəm bin Tariq Al Səidin Belarusa səfəri çərçivəsində "Yol xəritəsi" imzalanıb.
“Belarus Prezidentinin Omana budəfəki səfəri tərəflərə əldə olunmuş razılaşmaların icrası, birgə layihələrin müxtəlif sahələr üzrə praktiki mərhələyə keçirilməsi məsələlərini ətraflı şəkildə müzakirə etməyə imkan yaradacaq” deyə rəsmi xəbərdə vurğulanıb.
Aleksandr Lukaşenkonun təyyarəsi Omanın paytaxtı Məsqətə noyabrın 28-i axşam enib. Aeroportda onu Oman İnvestisiya Agentliyinin rəhbəri Əbdüssəlam Əl-Mürşidi qarşılayıb.
Lakin bundan sonra istər Omanın, istərsə də Belarusun rəsmi və ya qeyri-rəsmi mediasında, dövlət qurumlarının internet səhifələrində Lukaşenkonun səfəri ilə bağlı heç bir xəbər verilməyib.
Medianews.az bildirir ki, bu, sosial şəbəkələrdə və Lukaşenkoya müxalif onlayn media resurslarında bir sıra şübhələrə yol açıb, “Lukaşenko yoxa çıxıb”, “Lukaşenko Omanda yoxa çıxıb”, “Lukaşenko Omana gedəndən sonra gözdən itib” kimi başlıqlar altında xəbərlərin yayılmasına səbəb olub.
