Ötən il dekabrın 12-də səhər saatlarından başlayan aksiyanın artıq 79-cu günü tamam olur.
Belə ki, Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı fəallar və ekologiya üzrə qeyri-hökumət təşkilatlarının (QHT) üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir.
İstəyimizə nail olmaq üçün bütün sahələrdə savaşmalıyıq deyən şair Emin Piri Medianews.az-a davam edən aksiya haqqında öz fikirlərini bildirib:
“Mübarizə, savaş deyəndə bunu təkcə cəbhə, hərbi əməliyyatlar kimi dərk etməli deyilik. Necə ki, Vətən Müharibəsi həm də bu xalqın könül işi idi. Necə ki, həm də könüllülərin işi oldu, həm də bu torpaqların azadlığı həm də könüllü döyüşçülərin hesabına mümkün oldu. Zatən “könül işi” olmayan heç bir işin sonda uğurlu nəticəsi olmasına inanmıram.
Savaş qeyd etdiyim kimi təkcə cəbhədə deyil, bütün sahələrdə olmalıdır ki, tam hədəfə vurub istəyimizə nail olaq. İstər incəsənət, istər kino, istər ədəbiyyat istərsə bu cür ekoaksiyalar.
Bu aksiyanı da bir növ ayrı bir cəbhə adlandırardım ki, ordakı könüllülər də müharibədə olduğu kimi bizim istəklərimizi buxovdan azad edəcək, azadlığa qovuşduracaq. Hesab edirəm ki, bu cür gündəm olmuş, özündən səs yaratmış, dünya mediasına qədər uzanan aksiyanın yarımçıqlığı bizə uğurdan çox əks təsir effekti, günahkarlıq obrazını yapışdıra bilər.
Bu aksiyaların davamlı olması daha uğurlu olar. Düşünürəm ki, bu cəbhədə də uğur əldə edəcəyik”
O, həmçinin, əlavə edib ki, burada qərar verməli tərəf ermənilərdir:
“Həmçinin bu da bir mesajdır ki, Vətən müharibəsindən öncə Azərbaycan dövləti səbr etdi, gözlədi. Xalqın səbri bitəndən, bütün danışıqlar son həddə çatdıqdan, bəzənsə dinc aksiya, etirazlardan sonra savaş başladı və öz torpaqlarımızı azad etdik. Bu da eynilə onu göstərir ki, biz yenə səbrlə dinc aksiya ilə istəklərimizi , haqq səsimizi çatdırırıq. Yenə də bu haqq səsi eşidilməsə, qulaqardına vurulsa dinc aksiyaların son həddindən sonra hər hansı hərbi əməliyyatlar mümkündür. Azərbaycan dövləti həm humanist mesajını ötürür, həm də bu humanizmin qulaqardına vurulası halında gələcəkdə həyata keçirəcəyi yeni antiterror mesajını verir. İndi burada qərar verməli olan erməni xalqıdır. Təbii ki, başbilənləri öz xislətindən əl çəkməli olsa nə yaxşı. Çəkməzlərsə də Azərbaycanın dövlət kimi edəcəyi məlumdur və bu onun ən doğal haqqı olacaq. Orada aksiyada iştirak edənləri də yeni cəbhənin döyüşçüləri adlandırardım ki, vətən uğrunda döyüşdə hərənin öz missiyası var”.
Aytac Şahin
Medianews.az