Türkiyə Nazirlər Kabinetinin aprelin 12-də keçiriləcək toplantısında Azərbaycanla Ermənistan arasında sülh prosesi müzakirə ediləcək.
“TRT Haber” məlumat verir ki, toplantıda həmçinin Rusiya-Ukrayna müharibəsi, Türkiyədə iqtisadi vəziyyət və başqa məsələlər müzakirə olunacaq.
Kabinetin müzakirə edəcəyi məsələlər arasında terrorçuluğa qarşı mübarizə və yay fəslində davam edəcək əməliyyatlar da var.
Məlumata görə, Türkiyə Prezidenti Rəcəb Tayyib Ərdoğan iclasdan sonra ölkə əhalisinə müraciət edəcək.
Siyasi şərhçi Elçin Xalidbəyli Medianews.az saytına açıqlaması zamanı bildirib ki, Türkiyə Cənubi Qafqazda əsas geopolitik oyunçulardan biridir.
Onun sözlərinə görə, Rusiya da artıq Türkiyənin Cənubi Qafqazda söz sahiblərindən biri olması ilə barışmaq məcburiyyətində qalıb:
“Üstəlik, Azərbaycan-Türkiyə İttifaqı Rusiyanın Cənubi Qafqazdakı ənənəvi hegemon mövqelərini balanslaşdırır və Kremlin regionda imperialist planlar üzərindən davranmaq imkanlarını bloklayır.
Son vaxtlar Rusiyanın Azərbaycana dolayısı təzyiqlərinin atmaqda olduğu müşahidə edilir. Kreml Ermənistana hərbi dəstək vəd edib, bu düşmən ölkənin hələ delimitasiya edilməmiş sərhədlərini qorumağa hazır olduğunu bildirib. Digər tərəfdən, Rusiya Azərbaycanın rus sülhməramlıların müvəqqəti dislokasiya olunduğu Xankəndi və ətraf bölgəsində də üçtərəfli anlaşmalara zidd addımlar atmağa başlayıb. Hətta son vaxtlar Xankəndi və ətraf bölgədə törədilən hərbi təxribatlarda Rusiya sülhməramlı qüvvələri baş rolda çıxış edirlər. Belə anlaşılır ki, Brüssel görüşündən sonra Cənubi Qafqaza nəzarət mexanizmlərini itirmək təhlükəsi qarşısında qalan Kreml Rusiya sülhməramlı qüvvələrinə Xankəndi və ətraf bölgədə gərginliyi böhranlı həddə qədər artırmaq təlimatı verib. Belə anlaşılır ki, indi “artsax” Ermənistandan daha çox Rusiyaya lazımdır”.
Siyasi şərhçinin sözlərinə görə, təbii ki, bütün bunlara nə Azərbaycan, nə də Türkiyə müşahidəçi qala bilməz.
Ona görə də, Türkiyə hökuməti Azərbaycan və Ermənistan arasında yekun sülh sazişinin hazırlanması prosesini müzakirəyə çıxartmaq qərarına gəlib:
“Böyük ehtimalla rəsmi Ankara Kremlə Türkiyənin Azərbaycanın arxasında olduğununun açıq mesajını verməyə çalışır. Kremlə anladılar ki, Azərbaycan və Cənubi Qafqaz Türklərinin “qırmızı cizgiləri”dir. Rəsmi Ankara Kremlə həmin “qırmızı cizgiləri” pozmağa imkan vermək niyyətində deyil. Rəsmi Ankara Kremlə Azərbaycan və Ermənistan arasında olan problemləri Rusiyanın maraqları çərçivəsində təkbaşına həll etmək hüququna malik olmadığını başa salır. Yəni, Rusiya bundan sonra Ermənistana hərbi dəstək vermək niyyətinə düşərsə, Türkiyənin sərt reaksiyası ilə üzləşə bilər. Halbuki, Ukraynada ağır məğlubiyyətlə uğramaqda olan Rusiyaya Türkiyə və Azərbaycan ilə qarşıdurma qətiyyən sərfəli olmaz.
Digər tərəfdən, rəsmi Ankara Azərbaycan və Ermənistan arasında tezliklə yekun sülh sazişinin imzalanmasında da birbaşa maraqlıdır. Çünki, rəsmi Ankara Orta Asiya və Xəzər dənizinin enerji resurslarının Türkiyə ərazisindən Avropaya nəqlini planlaşdırır. Bu, Türkiyənin dünyadakı mövqelərini daha da möhkəmləndirə bilər. Ona görə də, Türkiyə də Azərbaycan və Ermənistan arasında sülh sazişinin imzalanması prosesinə nəzarət etmək qərarına gəlib. Bu, Rusiyanın pozuculuq fəaliyyətini böyük ölçüdə bloklaya bilər”.
Leyla
Medianews.az