Smartfon kameralarının inkişafı və süni intellekt dəstəkli görüntü emalı texnologiyalarının yayılması biometrik təhlükəsizliklə bağlı yeni müzakirələrə səbəb olub.
Medianews.az -ın məlumatına görə, təhlükəsizlik mütəxəssisləri bildirirlər ki, yüksək keyfiyyətli fotolardan, hətta adi selfilərdən belə barmaq izi məlumatlarının əldə olunması nəzəri baxımdan mümkün ola bilər.
Mütəxəssislərin sözlərinə görə, yüksək ayırdetməli kameralar barmaq izi kimi incə detalları daha aydın göstərir. Süni intellekt əsaslı görüntü yaxşılaşdırma vasitələri və foto redaktə proqramları isə adi gözlə seçilməyən detalları daha görünən edə bilir. Xüsusilə bir neçə keyfiyyətli görüntünün birləşdirilməsi biometrik məlumatların çıxarılması ehtimalını artırır.
Müzakirələrin mərkəzində foto çəkdirərkən verilən “V” işarəsi dayanır. Ekspertlər hesab edir ki, bu poza zamanı barmaq uclarının kameraya aydın görünməsi nəzəri olaraq barmaq izi məlumatlarının kopyalanması riskini yüksəldə bilər.
Bu risk yeni deyil. Biometrik təhlükəsizlik sahəsində aparılan əvvəlki araşdırmalar göstərib ki, açıq fotolardan və xüsusi proqramlardan istifadə etməklə barmaq izi bərpa etmək mümkün olub. Lakin mütəxəssislər qeyd edir ki, müasir smartfon kameraları və süni intellekt alətləri bu prosesi daha əlçatan edib.
Bununla belə, barmaq izi ilə identifikasiya sistemləri hələ də geniş istifadə olunur. Ekspertlər bildirirlər ki, biometrik təhlükəsizlik sistemləri qüsursuz olmasa da, gündəlik istifadədə şifrələrlə müqayisədə daha praktikdir və əsas təhlükələrə qarşı yetərli qorunma təmin edir.