Bu gün Bakı Ekspo Mərkəzində Bakı Enerji Həftəsi çərçivəsində keçirilən 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum”un rəsmi açılış mərasimi olub.
Prezident İlham Əliyev tədbirdə çıxış edib, digər çıxışlardan sonra “Azəri-Çıraq-Günəşli” yataqlar blokundan ilk sərbəst təbii qaz hasilatına başlanması mərasimi keçirilib. Daha sonra bir sıra sənədlər imzalanıb.
Medianews.az bildirir ki, “Azəri-Çıraq-Günəşli”dən ilk sərbəst təbii qaz hasilatına başlanması 30 ilə yaxın neft hasil edən və dünyanın ən böyük neft yataqlarından olan “Azəri-Çıraq-Günəşli”nin bu gündən həm də qaz yatağına çevrilməsi deməkdir.
“Azəri-Çıraq-Günəşli” yatağının işlənməsi layihəsinin operatoru BP şirkəti, tərəfdaşları “SOCAR”, “MOL”, “INPEX”, “ExxonMobil”, “TPAO” və “ONGC Videsh”dir.
Xəzər dənizinin Azərbaycan sektorunda yerləşən “Azəri-Çıraq-Günəşli”nin sərbəst təbii qaz ehtiyatlarının iri həcmdə - təxminən 4 trilyon kubfut çıxarıla bilən ehtiyatlar və bunun da 6 trilyon kubfutadək artmaq imkanı olduğu düşünülür.