2026 FIFA Dünya Çempionatının yarımfinalında İngiltərəni 2:1 hesabı ilə məğlub edərək finala yüksələn Argentina matçdan sonra meydanda açılan pankarta görə FIFA-nın intizam araşdırması ilə üzləşə bilər.
Medianews.az xəbər verir ki, Argentina 85-ci dəqiqəyə qədər geridə olsa da, Enso Fernandesin 85-ci və Lautaro Martinesin 90+2-ci dəqiqədə vurduğu qollarla oyunu çevirərək finala vəsiqə qazanıb.
Lakin final fitindən sonra argentinalı futbolçuların meydanda ispanca "Folkland adaları Argentinaya məxsusdur" yazılmış pankart açması siyasi mübahisələrə səbəb olub. Böyük Britaniyanın nəzarətində olan Folkland adaları ilə bağlı mübahisə iki ölkə arasında 1982-ci ildə 74 gün davam edən müharibəyə gətirib çıxarmışdı.
FIFA-nın siyasi mesajların nümayişi və komanda intizam qaydalarının pozulması səbəbindən Argentina Futbol Federasiyasına qarşı intizam tədbirləri görəcəyi gözlənilir.
Argentina oxşar hadisə ilə ilk dəfə qarşılaşmır. Komanda 2014-cü ildə Sloveniya ilə yoldaşlıq oyununda da eyni məzmunlu pankart açdığı üçün FIFA tərəfindən 20 min funt sterlinq cərimələnmişdi. Bundan başqa, Misir üzərində qazanılan qələbədən sonra futbolçuların paltardəyişmə otağında Folkland adaları, Dieqo Maradona və Lionel Messi ilə bağlı şüarlar səsləndirdiyi bildirilmişdi.
Gərginlik siyasi müstəvidə də davam edib. Argentinanın vitse-prezidenti Viktoriya Vilyarruel matçdan sonra sosial şəbəkədə futbolçuların pankartla çəkilmiş fotosunu paylaşaraq, "Onları stadiona gətirməyi qadağan etdilər, amma onları qanımızda və ürəyimizdə daşıdığımızı unutdular. Bu, adi futbol oyunu deyildi", - deyə yazıb.
Argentina millisinin baş məşqçisi Lionel Skaloni isə siyasətlə idmanın bir-birinə qarışdırılmamasının vacibliyini vurğulayıb.
"Bu, sadəcə futbol oyunudur. Keçmişdə yaşanan faciələrə böyük hörmətlə yanaşıram və bunları bir-birinə qarışdırmamalıyıq. Həmin hadisələr tariximizin ən ağrılı səhifələrindən biridir", - deyə o bildirib.
İngiltərəni mübarizədən kənarlaşdıran Argentina bazar günü keçiriləcək Dünya Kubokunun finalında İspaniya ilə çempionluq uğrunda mübarizə aparacaq.