Ermənistan 700 milyon dollara raket alır - "Bu, müharibə hazırlığıdır”

“Ermənistan Hindistandan 700 milyon dollarlıq "Akaş" zenit-raket kompleksi raketləri alıb. Raketlərin qarşıdakı aylarda Ermənistana ixracı nəzərdə tutulur”. Bunu Medianews.az-a siyasi şərhçi Məhəmməd Əsədullazadə deyib. O bildirib ki, Ermənistanın silahlanması regionda yeni eskalasiya riski yaradır: “Ermənistanın baş naziri Nikol Paşinyan bir tərəfdən müharibə olmayacaq bəyanatını verir, digər tərəfdən də kifayət qədər böyük məbləğdə silahlar alır. Bu, Ermənistanın müharibə hazırlığıdır”. M.Əsədullazadə onu da qeyd edib ki, Hindistandan alınan silahlıların texniki parametrləri son günlər Pakistanla savaşda effektiv olmadığını göstərib: “Hindistan istehsalı "Akaş" raket kompleksləri 25 km məsafə qət edir”. Siyasi şərhçi vurğulayıb ki, Azərbaycan Ermənistana silahlanmaya son verəcəyi təqdirdə sülhə hazır olacağı şərtini irəli sürməlidir: “Ermənistanın baş nazirinin ölkədə sosial problemləri həll etmək əvəzinə silahlanmaya bu qədər vəsait ayırması suallar doğurur. Ermənistan öz ərazisində Zəngəzur dəhlizi üzrə avtomobil yolu və dəmir yolu çəkmir. Həmçinin İranla Ermənistanı birləşdirən əsas yol infrastruktur baxımından köhnədir. Ermənistan əhalisi sosial problemlərə görə ölkəni tərk etməkdədir. Paşinyanın hakimiyyəti ölkədə miqrasiyaya son qoymayıb. Bu onu göstərir ki, Paşinyanın vəd etdiyi sosial proqramlar kağız üzərində qalır”. Toğrul Əli, Medianews.az