Media
Ayda ən azı bir dəfə taksi sürücülərindən şikayət eşitməzsək, təəccüblənərik. Müştərilərə qarşı kobud davranan, narkotik maddələrdən istifadə edən sürücülər barəsində dəfələrlə məlumat paylaşılıb. Qaydalara riayət etməyən sürücülərin arasına daha bir “qəhrəman” gəldi. Avqustun 23-də sosial şəbəkələrdə yayılan görüntülərdə taksi sürücüsü ayağını pəncərədən çıxararaq avtomobil idarə etməyə başlayıb. Həmin şəxs insanlar tərəfindən kəskin şəkildə tənqid olunub. Bu hala şahid olduqdan sonra cəmiyyəti bir sual maraqlandırır: Həmin sürücüləri işə götürən şirkətlər harada yanlış edir?
Taksi sürücüsünün davranışı ilə bağlı Medianews.az-a danışan nəqliyyat sahəsi üzrə ekspert İlqar Hüseynli bildirib ki, hadisədən 2 dövlət strukturu məsuliyyət daşıyır:
“Hadisə ilə bağlı dövlətin 2 strukturunun tədbir görmək səlahiyyəti var. Taksi və ictimai nəqliyyat xidmətinə həm Dövlət Yol Polisi, həm də Bakı Nəqliyyat Agentliyi nəzarət etməlidir. Xüsusilə, BNA taksi şirkətlərinə lisenziya verən orqandır. Bundan başqa həmin sürücülərin çalışdığı şirkət də məsuliyyət daşıyır. Taksi şirkətlərinin daxili nizamnamələri və 15-16 səhifəlik etik kodeksləri var. İşə götürülən hər bir sürücü ilə müqavilə imzalanır. Orada sürücülərin bütün vəzifələri qeyd olunur. Xidmətin vaxtında və keyfiyyətli təminatı və müştəri məmnuniyyəti əsas müddəalardandır. Həmçinin sürücü müəyyən kateqoriyaya sahib olmalıdır”.
Ekspert mənfi halların qarşısının alınması üçün ciddi tədbirlərin vacibliyini vurğulayıb:
“Dövlət Yol Polisi ilə Bakı Nəqliyyat Agentliyi vaxtaşırı reydlər keçirməlidir. Onlar sürücülərin vəsiqələrinə nəzər yetirməli və psixoloji, narkoloji testlər etməlidir. Həmçinin taksi şirkətləri ilə çalışmaq istəyən şəxslər üçün kurslar açıb 1 aylıq təlim keçə bilərlər. Kurslara cəlb olunduqdan sonra taksi şirkətləri onların ümumi durumlarını qiymətləndirilərək işə götürüb-götürməməyə qərar verməlidir. Təəssüflər olsun ki, bizdə bunlar edilmir. Ona görə də işçiləri qeyri-etik davranan sürücülərin çalışdıqları şirkətlərin cərimələnməsi vacibdir”.
Xanlar Əlibəy
Medianews.az
