Media
ABŞ-da aparılan araşdırma nəticəsində məlum olub ki, amerikalıların dörddə biri administrasiyaya qarşı silahlı üsyana hazırdır.
Medianews.az xəbər verir ki, Çikaqo Universitetinin Siyasət İnstitutu tərəfindən qeydə alınmış 1000 seçici arasında aparılan sorğuya əsasən, respondentlərin əhəmiyyətli bir hissəsi Co Bayden administrasiyasının “korrupsioner administrasiya” olduğuna və 2020-ci il prezident seçkilərinin “oğurlandığına” inandıqlarını bildirib. Araşdırmada bir çox amerikalının Bayden administrasiyasından çox narahat olduğu və tezliklə administrasiyaya qarşı silaha sarılmağın lazım ola biləcəyini düşündükləri bildirilib.
Sorğuda iştirak edən demokratların 80 faizi prezident seçkilərinin etibarlı olduğunu bildirsə də, müstəqil seçicilər üçün bu nisbət 51 faiz, respublikaçılar üçün isə 33 faiz olaraq qalıb. İştirakçıların 28 faizi zərurət yaranarsa administrasiyaya qarşı silahlı üsyana qatıla biləcəklərini bildirsə də, 37 faizi evlərində silah olduğunu bildirib.
Onu da əlavə edək ki, bir çox amerikalının da siyasi müzakirələrdən yayındığı bildirilib.
Xatırladaq ki, ötən il yanvarın 6-da ABŞ-da seçki məğlubiyyətini qəbul etməyən keçmiş prezident Donald Tramp tərəfdarları Konqresin binasına basqın etmiş və hadisələrdə 5 nəfər həlak olmuşdu. “ABŞ demokratiya tarixinin ən dəhşətli hadisələrindən biri” kimi qiymətləndirilən basqını bəziləri “çevriliş cəhdi” kimi qiymətləndirilir.
Konqresin hadisələrlə bağlı araşdırması davam edərkən, son sorğu ABŞ cəmiyyətindəki qütbləşmənin ölçülərini ortaya qoyub.
Leyla, Medianews.az
