Media
” “Rusiya və Türkiyə Cənubi Qafqazda prosesləri necə davam etdirmək barədə həm dövlər başçıları, həm də XİN rəhbərləri səviyyəsində daim danışıqlar aparırlar. Hər iki ölkə Cənubi Qafqazda birgə işləməyin yollarını daim müzakirə edirlər. Bu da təbiidir. Rəsmi Moskvanın və Ankaranın Cənubi Qafqazda iqtisadi və siyasi maraqları var. 44 günlük müharibədən sonra kommunikasiya xətlərinin açılması, xüsusən də “Zəngəzur dəhlizi” məsələsi hər iki ölkənin gündəmindədir”.
Bu sözləri Medianews.az-a açıqlamasında Milli Məclisin İqtisadi siyasət, Sənaye və sahibkarlıq komitəsinin üzvü Aydın Hüseynov bildirib. O, qeyd edib ki, belə meqalayihələr təkcə Ermənistanla Azərbaycan arasında yol infrastrukturunun inşası, yaxud Sovet dövründə mövcud olmuş kommunikasiyaların bərpası deyil:
“Zəngəzur dəhlizi Şərqlə Qərbi, Avropa ilə Asiyanı birləşdirəcək böyük nəqliyyat dəhlizinin bir qoludur. Bu marşrutdan regionun altı ölkəsi Azərbaycan, Ermənistan və gürcüstanla yanaşı, Rusiya, Türkiyə və İran kimi iqtisadi cəhətdən inkişaf etməkdə olan ölkələr də yararlana biləcək. Çin kimi dünyanın iqtisadi nəhəngini də bura əlavə etsək “Zəngəzur dəhlizi”nin əhəmiyyətini bir daha öyrənmiş olarıq. Rusiyanın xarici işlər naziri Sergey Lavrovun türkiyəli həmkarı Çavuşoğlu ilə dəhliz məsələsini müzakirə etməyə gəlincə, bu, Türkiyə ilə Rusiya arasında daim müzakirə aparılan mövzulardandır”.
Deputat əlavə edib ki, Rusiya ilə Ukrayna arasında artıq 104 gündür ki, davam edən müharibə Avropa kimi nəhən enerji bazarına Rusiyanın əlçatanlığını əngəlləyib: “Xüsusən də Ukraynadan keçən tranzit xətlərində müharibə səbəbindən baş verən qəzalar Avropanın enerji təhlükəsizliyində çatların əmələ gəlməsində başlıca rol oynamaqdadır. Ona görə də Rusiya alternativ yollar aramaqda davam edir. Bu yollardan birincisi Azərbaycandan və Türkiyədən keçən nəqliyyat damarıdır. Məhz bu marşrut daha təhlükəsizdir. Əslində bu xəttin açılmasında bütün tərəflər maraqlı olmalıdırlar. Bəzi hallarda Ermənistandakı bəzi qüvvələr “Zəngəzur dəhlizi”nin açılması fikirlərinin yanlış olduğunu düşünərək, hətta yolverilməzliyini də dilə gətirirlər. Amma hesab etsək ki, həm Ermənistanın da bu məsələnin həllində, dəhlizin açılmasında marağı və xüsusən də Türkiyə və Rusiya kimi ölkələrin bu dəhliz vasitəsilə yüklərin təhlükəsiz daşınacağına inamı var, onda “Zəngəzur dəhlizi”nin işə salınacağına yaxın tarixdə şahidlik edə biləcəyik”.
Zərif Ülvizadə
Medianews.az
