Vulkan püskürdü, ətrafa qızıl səpələndi

Antarktidadakı Erebus vulkanı qeyri-adi geoloji xüsusiyyətləri ilə elm dünyasını təəccübləndirməkdə davam edir. Dünyanın ən aktiv vulkanlarından olan bu dağ atmosferə lava ilə bərabər mikroskopik qızıl kristalları püskürür. Zirvəsində onilliklərdir aktiv olan nəhəng lava gölü vulkanın fərqli təbii proseslər yaratmasına səbəb olur.

Demokrat.az xəbər verir ki, alimlərin apardığı araşdırmalar nəticəsində vulkandan ayrılan qazın tərkibində gözlə görünməyən qızıl zərrəcikləri tapılıb. Hesablamalara görə, Erebus atmosferə hər gün orta hesabla 80 qram qızıl yayır.

Antarktidanın güclü küləkləri bu qiymətli metal zərrəciklərini yüzlərlə kilometr uzağa aparır. Lakin ekspertlər qızılın atmosferə çox kiçik ölçülərdə qarışdığını və geniş əraziyə səpələndiyini bildirirlər. Bu səbəbdən həmin qızılı toplamaq iqtisadi cəhətdən səmərəli deyil və bölgədə mədənçilik fəaliyyəti aparmaq qeyri-mümkündür.

Vulkanın təqdim etdiyi möcüzələr təkcə qızıl kristalları ilə bitmir. Erebusun dərinliklərindən gələn isti qazlar səthdəki qalın buz kütlələrini əridərək unikal yeraltı buz mağaraları yaradır. Bu ekstremal ekosistemi öyrənən elm adamları xarici dünyadan təcrid olunmuş mağaraların daxilində onlarla fərqli mikroskopik göbələk növü aşkar ediblər.

Beləliklə, Erebus vulkanı həm geoloji, həm də bioloji müxtəlifliyi ilə elm dünyası üçün böyük laboratoriya rolunu oynayır.