Kimyəvi vasitələrə pul tökməyin: Yastıqdakı bakteriya və qoxunu yox edən təbii çarə

Hətta ən yeni yastıqlar belə hər gecə istifadə edildikdə, xüsusən də yay aylarında təravətini tez itirir. Parça tər, dəri yağı və bədən qoxusunu özünə çəkdiyi üçün bir neçə aydan sonra yastıqlarda saralma və ağır qoxu yaranmağa başlayır. Üzlüklərin tez-tez dəyişdirilməsi və ya adi yuyulma bəzən problemi həll etmir.

Demokrat.az bildirir ki, illərdir istifadə olunan yastıqları belə ilk günkü kimi təravətli edən çox bəsit üsul var.

Bu sirrin əsas qəhrəmanı adi qida sodasıdır. Soda təkcə qoxunu yox etmir, həm də rütubəti və bakteriyaları aradan qaldırır. Yastığı yenidən təmiz və havalı etmək üçün iki xörək qaşığı sodanı yastığın üzərinə bərabər şəkildə səpmək kifayətdir. Bir neçə saat gözlədikdən sonra sodanı yastıqdan silkələyərək təmizləmək və ya tozsoranla çəkmək lazımdır. Bu metod həm sintetik, həm də tük yastıqlar üçün uyğundur, çünki dolğu materialını islatmağa ehtiyac qalmır.

Əgər qoxu çox kəskindirsə, sodaya bir neçə damcı lavanda, evkalipt və ya çay ağacı efir yağı əlavə etmək olar. Bu yağlar həm xoş ətir verir, həm də antiseptik təsir göstərir. Ekspertlər bildirirlər ki, soda nəmi özünə çəkir və turşuları neytrallaşdırır, yağlar isə dezinfeksiyaedici effekti gücləndirir. Nəticədə yastıq mağazadan yeni alınmış kimi təravətli qoxuyur.

Yuyula bilən yastıqlar üçün isə yarım stəkan sodanı birbaşa paltaryuyan maşına əlavə etmək məsləhətdir. Yuduqdan sonra onu mütləq günəş altında və ya açıq havada tam qurutmaq lazımdır ki, içəridə qalan nəm yenidən qoxu yaratmasın. Bu proseduru hər 2-3 aydan bir təkrarlamaqla yastıqların ömrünü uzatmaq və sağlam yuxunu təmin etmək mümkündür.